مركز تحميل المنتدى

تذكر أن الله يراك
الامتدادات المسموحة: gif, jpg, png, bmp,
الحجم المسموح به: 1000كيلو بايت

استرجاع كلمة المرور | طلب كود تفعيل العضوية  | تفعيل العضوية

 اضغط هنا للحصول على حالة الطقس

روابط الموقع هي b7aaruae.com و hymanuae.com


العودة   منتديات بحار الامارات ... > ][®][^][®][ الأقسام العـامــة ][®][^][®][ > الأرشيف

الإهداءات


 
 
أدوات الموضوع إبحث في الموضوع طرق مشاهدة الموضوع
  #1  
قديم 08-01-25, 01:26 AM
الصورة الرمزية هيمان يالمحبوب هيمان
هيمان يالمحبوب هيمان هيمان يالمحبوب هيمان غير متواجد حالياً
™§®©« المدير العام »©®§™
‰¸¶المديـ½ر العـ½ام ¶‰
هيمان يالمحبوب هيمان





معدل تقييم المستوى: 10 هيمان يالمحبوب هيمان is on a distinguished road
Icon110 الشاعر/ أحمد علي الكندي المرر

السلام عليكم ...

أحمد بالكندي
الشاعر/ أحمد علي الكندي المرر
ولد عام/ 1940م وتوفي في 26/12/ 1985م
وقد اشتهر باسم الكندي وينتمي شاعرنا الى قبيلة المرر المعروفه ... وهي من قبائل بني ياس ... لقد كان الكندي من الشعراء الذين ساهموا في تطوير القصيده الشعبيه والمحافظه عليها بين الفنون والاداب
الشعبيه الاخرى لدولة الامارات ...

هذا هو الشاعر بالكندي المعروف .. واسمحوا لي بعرض قصائده عليكم ...

والسموحه على القصور ...

// خشف الريم //




صباح الخير من بدري = احبّك و انت ما تدري
وكيف اصبر على حبك = وحبّك نار في صدري
صباح الخير يا غالي = حياتي وكل آمالي
وكيف اشرح لك احوالي = ولا أعلم بما يجري
ملكني الحب سلطانه = لعب في الراس شيطانه
تبات الروح هيمانه = ولك طول الدجى تسري
جمالك رايع المنظر = يخلي العقل يتحير
وعلى بعدك انا ما اقدر = كفى ياطلعة البدري
ألا ياريح ودي له = تحياتي وشوقي له
وعند الصبح قولي له:= " صباح الخير من بدري "


غريم نصوحي

إن رحت عني راحت الروح منّي = وإن جيتني ردّيت بالجسم روحي
شوفك يشيل الهم والحزن عنّي = وفرقاك يا مملوح يدمي جروحي
ألحاظ عينك في هواك اذبحنّي = كلام صدق ولا كلام المزوحي
نيران حبك في الضمير اشعلنّي = ما تنطفي باسباب كل الجروحي
وقت القمر كل النجوم اطمسنّي = تضاعفت ما تنظر بالوضوحي
دونك خيولي في الطريق اعثرنّي = ردت بخسر وزاد الخسر نوحي
ارماح فرسانك صحيح اطعننّي = وانا قتيلك يالحبيب الشحوحي
ليت الليالي في هواك اجمعنّي = بيني وبينك يالغزال السروحي
خذني حبيبي في الهوى بالتأنّي = والطف بحالي يالمحب الذبوحي
شوف الليالي في ودادك قصنّي = واسخيت قلبٍ لك غريمٍ نصوحي


بدو لخويره

وين شدّوا بدو لخويره = لي عليهم نثني الجيّه
ليش ماهم بدّلوا غيره = واخلفوا يا خادم النيّه
عدّهم عفيت مصاديره = والمنازل مالها بيّه
وابعدو به ياالله الخيره = راعي العين الذبوحيّه
خبّروني وش من الديره = لي سكنها بدو لبنيّه
صوبهم في خاطري سيره = فوق جيبٍ يقطع الفيّه
في "الورش" ماوظّبوا قيره = ولا تولوه العليميّه
يطرب السّواق في سيره = لي ضرب دارٍ خلاويه


برق الجنوب

شاقني عقب العشا بارقٍ شفته جنوب = استخيله صوب دار المحب ومدهله
ارعدت سحابته يوم زغاها الهبوب = بارق لين الفجر ما تغيّر منزله
يعل يسقي بالحيا دار محبوب القلوب = لي وداده في الحشا ما رضينا نبدله
يعل يسقى لي ظهرتم على ذيك الدروب = منتوين ٍ صوبنا في الليالي المقبله
يادقيق العنق وصلك عليّ من الوجوب = غير وقتي ماسمح والظروف المشكله
شوفكم ياداعج العين يبري كل صوب = والوطن يزهو بكم لو خليّ من هله
زين دارصاحبي فوقها صف الطنوب = تصبح القيعان خضرا ولو هي ممحله


النسيم الرايح

يا ذا النسيم الرايح = سلّم على المحبوب
سلّم سلامٍ فايح = فيه العطر مسكوب
قله تراني رايح = مالي عليه دروب
حالت دونه برايح = فيها الهبوب تلوب
لو بايفيد الصّايح = صحت ومزعت الثوب
خلاّ جسمي شرايح = مثل الرصاص يذوب
ما فادتني النصايح = اصبر وعنه اتوب
شوفه كل الفرايح = لي غاية المطلوب


يا مطر

اتعب الموتر على مسكن وديمه = واتمنى شوفها لو ربع ساعه
زينة الرمسه وفي المنظر رحيمه = حبّني للزين لو مالي طماعه
تفهم العدله وقومتها حشيمه = شفّها العدلين والعاثر ادفاعه
يامطر قم ودّني حسنه وشيمه = واكسب المعروف يا خير الجماعه
صوب لي شوفه دوا الروح السقيمه = حام قلبي له وعجلٍ في اندفاعه
قاطع المرسال واسبوقه قديمه = وان قبضته قص سِِِِبقه من ذراعه
شفّه اللي فيه عاداتٍ عديمه = كامل الأوصاف حلواتٍ اطباعه
طيّب الخاطر وله حشمه وقيمه = ينشرح قلبي لشوفه واستماعه
ان تباعد صارت العلّه عظيمه = وان بغيت اجيه صابتني مناعه
ان عفى عفوه وشيماته كريمه = وان ملكني في الهوى سمع وطاعه


جار الزمان

جار الزمان وفرّقتنا المقادير = وابعدت عن شوف الوطن وامحبوبي
في داعة الله ياهل الجود والخير = ياهل السخايا ماخذين القلوبي
ابعدت عنكم والمفارق تساخير = ولا هان قلبي بالفراق امغصوبي
وباقصى الحشا نيران ورد ومصادير = واكتم صوابي والعرب ما دروا بي
وذبيت م الضيقات روس الشناظير = واعوي يالين اتهد منها الشعوبي


العين

عقلي وروحي داخل " العين " = والاّ هنا جثّه بلا روح
مسكين عشّاق المزايين = مثل الغريق اللّي على لوح
الحب كم طبّع ملايين = راحوا وانا بالمثل باروح
يامن سقاني كاس حرفين = واصبحت في لفراش مطروح
ان غثتني يا كامل الزين = نلت الأجر وانقذت لك روح


غاب القمر

الدار من عقبهم ما هي بمرغوبه = باشوم انا مثلهم ما لي طرب فيها
والليل من عقبهم عندي فرش ثوبه = غاب القمر غاب لي نوره يحليها
والعد ماعاد لي شمقة على ادروبه = ولا عاد لي باقية حاجات واتليها
وداعة الله ياللي شد واقفوا به = الدار عقبه غدت ماحد يبغيها
النفس ماهي على المقعاد مغصوبه = والعين ما تستريح بدون غاليها
ان قدر الله ودي بسيرة صوبه = اريح الروح من شوفه واسليها


ظروفي

ظروفي فرّقت بيني وبينه = وانا صابر وانا هذا نصيبي
ابوعينٍٍٍِ سواة الوحش عينه = وهانا بين موجات الغبيبي
انا احبّه على حسنه وزينه = ذريبه مشيته ما فيه عيبي
حياتي طلبتي لمسة يدينه = حبيبي بالسلام يكون طيبي
ترى الاسلام هو ديني ودينه = وشرع الله بظنّي لايخيبي
انا في حيرتي وأقول وينه = طبيبي لا تخلّيني طبيبي
انا الباكي عسى ان الله يعينه = ترى انّ الله للداعي مجيبي


نور القمر

نور القمر يانور = خلك عليه نور
في الليله الظلما = خلّك عليّه نور
لا تبتعد عنّي = لك في الهوا فني
أهواك وأغني = نوّر علّي يا نور
نورك قمر ليلي = بعدك انا ويلي
خرست مناديلي = وانا انتظر يا نور
لك عمري الغالي = وانته شقى حالي
دوم انته في العالي = انزل معي يانور
محتار شا اسوي = من غيرك ايضوّي
القلب متكوّي = وانته بعيد يا نور


الصاحب الغالي

فدينا حبيب الروح والغير ما نفداه = ابيع العمر والروح للصاحب الغالي
لي مالجى في الروح للغير خلّيناه = احب المحب وم الدنّي خاطري سالي
ابو قذلةٍٍٍَِِِِِِِِِ سمرا على الكتف ملواه = يلي من نظرها سالي ما غدا سالي
نقط في حجر عينه صعب ماحدٍٍ يقراه = سوى عارف يعرف وزن خالي ومالي
عزيز بعز أهل المعزة ومن يدراه = ومن يفهم العدله غدا غالي وغالي


حلو السجايا

قطعت ا لوصل يا حلو السجايا = ولا ادري وش علامك ما تجيني
طويت رشاك ثر عن ورد مايا = وصرت اتخوز عن دربي وعيني
تخليني ادوي من ظمايا = على البيبان مهجور حزيني
اخاف اسباب صدك م الوشايا= كثير الناس فيهم غادريني
اذا لك في هوى غيري بغايا = انا ما اتبع هوى اللي ما يبيني
ولا اجبر نفس ما تبغي هوايا = ولا ترضى سلوم الطيبيني
حبيبي زورني واجبر عزايا = وخل ا لواش في غيظة دفيني
عذابي طال منك واعنايا = وصبري قد نفذ وين المعيني
عسى الله فيك ياصل لي رجايا= ونصبح في هوانا مهتنيني
ونسعد في المحبه يا منايا= بجو خالي"م"الحاسديني
عليك اغار من ريح الصبايا = اذا لفك من يسار ومن يميني
ومن كاسك على لمس الشفايا = ومن شيلك على لمس الجبيني
ودادك لدني لد الظمايا = وغير حالتى يا نور عيني
جعلك الله حلمي والروايا = وفي دربي خيالك لي قريني
وفي عيني عزلك امن البرايا = بكل اوصاف من طبع وزيني
عديم في المداين والقرايا = شراتك من جميع العالميني
تجر الروح بعيون دعايا= وخد كالقمر ساعة يبيني
شعلت النار في باطن حشايا= تعذبني وقلبك ما يليني
الا يا عاذليني في هوايا = انا ما سمع لكم يا عاذليني
طريق الحب بالني بلايا = ومكتوب على صفحة جبيني


المحبه جنوني

كلما جيت بابك = مانعتني ظنوني
الله اكبر مصيبه = وان دروا يفضحوني
كيف اسويّ محبه = والمحبه جنوني
كم اداري عشانك = لا الملا يفهموني
إنت عقلي وروحي = وإنت مقلة عيوني
وأجعل الصعب سيدي = في سبيلك يهوني


دانه يا بحر

دانه يا بحر دانه = خلقها الرب سبحانه
ومن طواشها المالك = سعيد الحظ في الدانه
فريده لولو بحري = بروعة شكلها السحري
عسى ياليلة القدري = يجود الحظ في الدانه
إهي في بطن محاره = عظيمه فوق بحاره
على لقماش مختاره = على الرّتي وميزانه
ولو بتعب سفن جمله = وغوّاصين بالجمله
وفي قاع البحر جمله = فلا شي مثلها دانه


من تقنع النفس

من تقنع النّفس قنعت لو تعاتبها = ما عاد ترجع كما لول على العاده
شيًّ بلا شفّها ما عاد يطريها = اذا انكفت مالها في تركها راده
نفسي على ما كرهت ماني بغاصبها = ماهي على المخدعه والشين معتاده
بالأرض عايش وماشي في مناكبها = والحمد والشكر للمعبود وزياده
ماحد رزقه بيد غيره ويطلبها = الرزق عند الذي يرجونه اعباده
خل الهضيمه وترّكها لصاحبها = لو كان عندك بعيرٍ عاجز اشداده
من تلدغ اليد في الحفره عقاربها = ما تردّها ثانيه والعقرب اسداده
واختار من الهجن سير البعد يطربها = ماتتبع الظل يوم الشمس وقاده
والدار من يوم تتكدّر مشاربها = ما للعيشه بها ذوقٍ على الراده
ما تدمع العين إلا لها سبايبها = إما وغف أو بها علة ونكاده


تذكار

ان غبت لك في القلب تذكار = صوره رسمها لك خيالي
بين الخمايل تحت الأشجار = في جو م الاكدار خالي
مع النسايم وقت الاسحار = في الساكنات من الليالي
تعتز باللّي مثلك الدار = حافظ على امجاد الأهالي
عليك قلبي ولّع بنار = في اليوف سوّت لي اشتعالي


يا بو علي

البارحه يوم المخاليق هجّاع = ونّيت تالي الليل محدٍ درى بي
ابي امتنع والقلب ماهو بمطواع = متولّع في حب زين الشبابي
ابو ثنايا كنّها برق لمّاع = اللّي نهب عقلي وضيّع حسابي
نقطه على خده ترى الخد شعاع = تشبه بنقطه غيم بين السحابي
والى مشى يمشي مشي ريم مرتاع = يسمع صفير اللّي حبا في المحابي
يا بو علي قلبي من الشوق ملتاع = الحب صوّبني وهذا صوابي
ماريت انا في شقّة الثوب رقّاع = ويلاه يا قلبي مطول عذابي
أحسّ في قلبي كما شوك شكّاع = ويلاه يا غرٍ غريرٍ غدا بي


روّحت عنهم

روّحت عنهم وحالي فارقه طيبه = ياطول صبري على همّي وغربالي
عزي لقلبٍ عذابه من محابيبه = ما يتعب القلب غير الواحد الغالي
ويلي على اللّي يرضّف لي تراحيبه = لي جيت بيته وعنده ينشرح بالي
البعد يا صاح مرّاتٍ مشاريبه = والوصل ذوقه مع كل الملا حالي
يا صاحب الزين لي دايم تماريبه = الحق لك وانت عندي منزلك عالي
انته دوا عوق قلبي وانت تدري به = وانته دوا علّتي يا طيّب الفالي
أبغض بغيضك واودّ اللّي تودّي به = شفّي لشفّك وصوعي منك يحلالي


عديم الوصايف

سلامي على اللي تالي اليوم مريناه = علينا العصير ومرّوا الربع عجليني
عديم الوصايف حدّ قلبي على المقصاه = ياليته على سيت المخدّر يخاويني
وجودي على قربه وجودي على لاماه = وياليت والي الامر عنده يخليني
خذوني عنه وانا حزينٍ على فرقاه = صويب المحبه ما حصل من يداويني
شبحني بعينٍ من رمت فيه ما تخطاه = وماني بها في حين ربعي مقفيني
عزيت بعزاوي والعزاوي بغير ادراه = ولا من نشد عنّي ولا من يعانيني
ألا يا عذابي كم بصبر على فرقاه = ومن عقب ذا المره متى تنظره عيني
تولعت به من زين طبعه ولطف احكاه = عذابي غرامي في الهوى كامل الزيني
يلي من عرض لي قلت زينه ويامحلاه = وان اقبل اقول الموت يا ناس موحيني


لي ما يحبك

يازين كان اخطيت مسموح = ما ينحكى في الشي لي راح
لونا دريت ابخافي الصوح = ما اتكلفت هجني بمرواح
لي من جفتك الدار بوضوح = خل الديار إلزرب لارياح
ولي ما يحّبك داخل الروح = كنّك على صدره جبل طاح


غالب الشاطر

عيونك تجبر الخاطر = وحبك غالب الشاطر
ملكت الروح ياروحي = ملكت العقل والخاطر
وكلماتك تخلّيني = سليب العقل والديني
وبسماتك تودّيني = لبحر ماله آخر
جمال الورد في اخدودك = ودهن العود من عودك
تعطّر منّخ اجعودك = وتصبح زهرة الخاطر
حياة الروح في ضمّك = وفي لمّك وفي شمّك
خفيفه روحك ودمّك = وفي حكم الهوا شاطر


المقناص

طرشنا مع الحاكم نهارٍ نوى بيشوم = معزّم على المقناص عجلٍ وقصّادي
لطيف المخوّه سبع ظلما خفيف النوم = قوي العزايم مقتدر وين ما رادي
شعاهن من" الظفره" تداوس صبخ وحزوم = ورملٍ كما الجبال واسيوح تنقادي
الى" ظفار" و"الجده" وهو حقهن جيدوم = جداد المواتر لي مشت تقطع العادي
ونقوة حرار الشام مع طيبين قروم = وكل اشقرٍ ممدوح للرّبد صيّادي
وكلٍ مدح طيره وهدّه على زمزوم = نزل مثل برقٍ بين شعفٍ ورعادي
هذا يهدّ وذاك يبغي الحباري تقوم = وذا ينعزل منه وهذاك قد صادي
هذاك طيره يوم هدّه شهر في الحوم = وقف بتلواحه على الحزم وينادي
مكثنا بها مدّه قنصنا بها المقسوم = كبار الثنادي والتوافيق م الهادي
ومن عقب ذا آمر عليهن عقيد القوم = وخذهن على دار الوهيبه على جادي
يلي حوّلن من سيح طاحن لهن مثموم = ولي طوّفن وادي تعرّض لهن وادي
وكم هوجعن سوّن بذاري نقاه رسوم = مقر الجوازي ناحرت فيه لا نوادي
ولمرير داجن به عليهن تلايا يوم = ومنه بدا المنكاف والسير متهادي
ومرّن على وادي العميري بيوم غيوم = وشقّن مياه السيل والسيل هدّادي
قصدنا بلاد العين يا زين ذاك اليوم = مناكيف م المقناص ناصين لبلادي
مع شيخنا زايد ذارنا عساه يدوم = حميد الخصايل حقنّا ذخر واسنادي


بن سعيد


يا بن سعيد القلب كنه على مجمار = سرى الليل كلّه ما غفى الجفن برقادي
وانا كل ما ونيت كن ابحشايه نار = تزايد لهبها باطن الجوف وقّادي
على صاحبٍ حبه سطى بالضمير وجار = صديقي ويفعل بي على كيف مارادي
دقيق المعنّق والمضيمر كما الدوّار = حياتي ومنوة خاطري غض لنهادي
وجودي على وصله توجّاد سبع امرار = ولو كود ينفع فيه كثر التوجادي
وجودي على اللي عقب ماكان عندي سار = وانا ابكي كما اللي فاقدٍ شوف لولادي


مليك الغرام

يقولون من هو حبّ ما يهتني بالنوم = وانا مثل ما قالوا ترى النوم ما جاني
وقالوا بعد يبدى خلل في العقل ملزوم = وانا منك هذا بادي العقل نقصاني
انا لا قتيل ولا سليم ٍ ولا مرحوم = مليك الغرام وجارف الشوق ودّاني
جذبني هواهم يعلهم في السعاده دوم = ولو بي وجع منهم تحمّلت ما جاني


الفراق

ولّيت يا وقتٍ رمانا بالافراق = فرّق قلوبٍ مبطيات ولايف
يا وقت فعلك منّه الجوف ماطاق = يا وقت فعلك منّه القلب عايف
حسبت ظني فيك يا وقت صداق = واثره مسيرك م الظنون ابخلايف
يا عبرةٍ في الجوف من حرّها ضاق = صدري وسوّت لي سعير ولهايف
اسباب من ذكره له القلب يشتاق = عليه دمع العين ينحي رضايف
بو منحرٍ ياضي كما الصبح شعّاق = يغشاه ليل ينقلنه ردايف
وثمان بيضٍ كنّهن لمع براق = امقرّن الحيّات سودٍ عطايف
والعين عين اللي على الكف خفّاق = لي شاف جولٍ م الحبارى يتقايف
والعنّق عنّق غزيلٍ شاف تفاق = ما وكّده وازم مذيرٍ وخايف
قلبي تولّع به على طيب لخلاق = زين الجناب وكامل ٍ بالوصايف
هوه طبيبٍ لي يلي كنت معتاق = ودواي من صافي الثمان الرهايف
ألذلي بالكيف عن كاس عرّاق = وبه تشتفي الامراض لو هي كلايف
وريح انسمه عن رايح الطيب فاق = وعن ريح مشمومٍ اغصونه قظايف
وعن ريح وردٍ قد زهر بين لوراق = يحيى يه اللّي منّه القلب صايف
حبّه هداوه مامشى به بلطفاق = متركدٍ ما زعزعوه الخفايف
ولي من مزح يمزح لزينين الاخلاق = ولي من هرج ما يعطي الهرج زايف
حبّه غدا للجسم والحال سرّاق = وغلاه عمّا ضمّه اليوف طايف
يا بوخدودٍ مثل ما صفح لوراق = ونهود يحميها رهيف الصنايف
وصلك غدا ممنوع يا مدمج الساق = ودونك نزت لي عاليات النوايف
صلاة ربي عد ماناض برّاق = على النبي ما طاف بالبيت طايف


هرقل الروم

أهلا هلا باللّي لفاني مسا اليوم = يا مرحبا بقدوم من كان غالي
الصّاحب اللّي عقب فرقاه مهموم = غالي عزيزٍ من محله عنالي
الشكر لله واشكره دايم الدوم = الغالي اللّي حاز كل الكمالي
في جيته شفته كما " هرقل " الروم = خضعت له والله عزيز الجلالي
رحبت به من خافي القلب ملزوم = الغالي اللي منقطع من حبالي
عليه قلبي دايم يكسر الحوم = يكسر بجنحانه بروس العوالي
بكيت من بعده بكي غر مفطوم = يبغي الرضاع ولا وجد من تسالي
يبكي رضاع أمه من الثدي محروم = ولا لبن من راعيات المفالي


نسى الله من نساهم

ساكن قلبي غلاهم = أبدًا ما يرخصون
كيف ابدل سواهم = والهم عليّ ديون
نسى الله من نساهم = دام العمر مضمون
مادام اكسب رضاهم = كيد الحسود ايهون
ناسٍ ربي عطاهم = طبعٍ لطيف ولون
ومن الحلاه اكساهم = نور الجمال افنون
يعل الولي يرعاهم = عن ناظرة العيون
انا البّي نداهم = وامشي بما يبغون
خاضع واتبع هواهم = واللّي يكون ايكون
احبهم واذراهم = وارضى بما يرضون
الله يسقي حماهم = من مدهمات مزون
خيّم وامطر سماهم = أعشب وسوّى لون


يا سعد
يا سعد شوف خلّي = دايمٍ في عتابه
ويل قلب المعنّى = من حبيبه عذابه
يا سعد طب قلبي = عند حضرة احبابه
ودّ منّي سلامي = دون خط وكتابه
قل لهم يا سعد = قلبي تزايد صوابه
بعدهم يا سعد = قلبي تكدر شرابه
وان حضر من احبه = طاب قلبي صوابه
مرحبا يا حبيبي = خل غالي جنابه
من يشوفك يهلي = يا هلا بالحبابه
طاب ليلي على = انغام عود وربابه


تعالي

يا حبيبه تعالي = واشرحي هم بالي
ما علّيه ملامه = في ودادك تعالي
انتي اللّي احبه = انتي كل المحبه
من يلاقي محبّه = له تطيب الليالي
القمر زان نوره = عندي الزين نوره
طاب قلبي سروره = دام نوره اقبالي
مرحبا يا منايه = يا حياتي وهوايه
رغبتي ومبتغايه = يا حبيبه تعالي


راجع للاوطان
يسقى يلي نويت راجع للاوطان = وين الظبي تقفي وتقبل ورودي
وانظر بعيني من المها ورد غزلان = حمر الخدود امورّدات الجعودي
ويكون قلبي من التكادير فرحان = للي هواهم في حشاي امعقودي
مالوم يا قلب غدا اليوم ولهان = اطلب عسى ربي علينا يجودي
يا عين هلّي الدمع من موق مليان = دمعٍ على الوجنات ينزل حشودي
ابكي عليكم يالاجاويد مشتان = واحب انا في حيّكم لي وجودي
لي من بغيت القلب يدله بنسيان = من صوبكم هبّت ذعاذيع نودي
تذكّر اللي داله دون خلان = وتشوّق اللّي عاف نوم الرقودي
كريم يا برقٍ سرى الليل زفّان = مالي سحابه خالي م الرعودي
يعله عليهم ينثر الجود غدران = لين الوطى تدفق عليه النفودي
امقيظهم لي يا الشتا فيه سكان = مرعى حلايب بومياديل سودي
وعقب المحل يحيا وطنهم بحيّان = م الوسمي اللّي به نبّت كل عودي


بدا الهجران

انا ونّيت والخاطر تكسر = من الفرقا وليعات الزماني
محبّي من بعد حبّه لي تنكّر= وش اسباب الزعل اول وثاني
بدا الهجران مثل الشمس يظهر= وما ينوي حبيبي ما خفاني
الله اكبر على من هو تكبّر = قسى قلبه ومن عطفه نساني
قطع حبلي وعنه الطير خبّر = وهان الود عنده والمعاني
صبر قلبه وقلبي ما تصبّر = يخيله في الدقايق والثواني
ابو عقصٍ على المضمر تحدر = وعودٍ مثل عود الخيزراني
وخدّ مثل خد الريم وانور = وعنقٍ مثلما عنق الدماني
احبّه من صميم القلب واكثر = رفيع القدر عندي ما يهاني
ولكن ويش بيدي في المقدّر= رضيت بما كتب والله عطاني
كذا راعي الخوى يربح ويخسر = وماجت به ليالي السعد فاني
إذا زرعي بخل ما عاد يثمر = فكيف اسقيه بالسبع السواني


يا كحيل الطرف

يا كحيل الطرف ياذاك الجميل = جوك الصافي عليه وش كدره

ما نظرتك العين من وقت طويل = لا ولا منك نديب اتخبره

كم تقول الناس محبوبك يميل = صوب غيرك هاجرنك واهجره

قلت انا ما اسمع لكم قال وقيل = في انتظاره لين عيني تنظره

ياحبيبي ليش في وصلي بخيل = كم تعذبني ولا لي مغفره

ارحم اللي عاش في حبك عليل=قبل ما يخسرك وانت تخسره

المحبه تتلف الجسم الثقيل = لا اتفكرها لعوب ومصخره

اسأل اللي جربو كم من قتيل = في بحرها راح محد اظهره

يا قمر وقتي وعقلي والدليل = والامل اللي انا بتصوره

أنت راحاتي وعن شمسي ظليل= وانت اللي للشدايد

انا هاضني


انا هاضني ورق ٍ طروبٍ يجر الصوت=طروبٍ وانا قلبي بدافيه تخليفي
ويامل قلبٍ ماذكرله دوا منعوت=جرحه غتم من لابسات المراهيفي
عزّي لحيّ من صوابه خطير الموت=وباوّل شبابه هبّلن به غطاريفي
تمنّيت عندي أمريكا رفيع الصوت=سريع ادورانه وان بدا بالمشاريفي
طعامه يجرونه من الارض حسب القوت=يركّب على بيبه ولوفٍ مراضيفي
ولاهو بمن طرز الجماسي زطرز افروت=شنابات له قدام ليته معاطيفي
يروّح ظهيره عجل قبل الصلاه اتفوت=تسكّر الجامات وان هب لك هيفي
يقّرب وليفٍ حال دونه وعر وخبوت=وجوّان تتلاها زميمٍ مواقيفي
فرقني منه وابعد زمانٍ ردي اوقوت=فرقني كما فرقا ((علي)) م المواليفي
الى من رقيت الرجم هليّت دمع اركوت=على من سلامه مالفوا به مناكيفي
جبيب المضمّر مجتلد مثل طي الفوت=ولي من مشى موزٍ لعب به هوا الريفي
حشيمٍ ويدري حشمته من كلام ازفوت=طروبٍ ويلعب بالقلوب المشاغيفي

كم لي وكم لي


كم لي وكم لي وكم ذكرى أسجّ ابها=لي نامت الناس انا ماغمضت عيني
يامن سلب مهجتي مني وشط أبها=طال المفارق وخفت انك تجافيني
كلّفت نفسي على شانك وبتعبها=ان كان يانور عيني عاد ترجيني
الروح بيدك وانت اللي معذبها=والحق عندك ومايرضيك يرضيني
يوم المودّه رمتني في مصايبها=ياليت ماكان بين ايديك ترميني
لانته رحومٍ ولا روحي تروف ابها=كل المحبه شقا وانته تشقيني
الروح لو تاصلك نالت مطالبها=واصبحت في الناس اسعد كل حييني
كم اسأل الريح لي هبت هبايبها=ولامن الريح خبرٍِ بايسليني
صبّرت قلبي وكبدي زاد لاهبها=تذرف دموعي ونار الشوق تكويني
ياطول صبري على عالي مراقبها=ومجاوب الورق لي غنّى بصوتيني


حي النسيم الهادي


حيّ النسيم الهادي
لمطليّ
لي شوّقني هواه
أحيا عروق افوادي
محلّي
ارضٍ بلا مرقاه
لي جاب ريح النادي
من خلّي
ريحٍ طيّب هواه
هو طلبتي ومرادي
قصدٍلّي
لي عالي مستواه
له في قلبي ودادي
مازلّي
له في الحشى ملياه
ياجاعد الانهادي
لاتخلّي
عاشق حبك طواه
ضيّعته في عوادي
مايدلّي
ياما حزمٍ رقاه
طواه جرف الوادي
وانشلّي
جارف قوي ماه
مايهتني برقادي
معتلّي
ضاع الطبيب ادواه

سقى الله غياثي

سقى الله ( غياثي ) من قنيف الوسامي دوم = عسى كل عام ماطر السحب يسقيها
على شان يسكنها الغضي بونهد مزموم = عسى والي القدرة يزين مراعيها
وياحي من شفته عليها صباح اليوم = يشط العيون اللي سلا الغي راعيها
ولوانا مخير ودي امرها كل يوم = على شان عيني تنتظر شوف غاليها
جبيب المضمر حط لي في الضمير رسوم = جروح طريه ما حصل من يداويها
ترى اللي يحب الزين ما يلحقونه لوم = طروق الموده كل حي مشى فيها

ابيات للكندي

تذكّرني علامات (( البديعه ))=ونيشان المويه اللّي قفاها
زمانِ قد رعينا في ربيعه=ودارت به رحى الدنيا وراها
عسى الايام لي مرت سريعه=عسى ان اتعود الغالي معاها


البديعه : أسم منطقه تقع بالقرب من مدينة زايد بالمنطقه الغربيه



ياحن قلبي على المحبوب=حنين ((دوجٍ)) مع مصعاد
ياقلب لي ما استطعت اتوب=وش حيلتي فيك ياودّاد
علّقتني في هوى رعبوب=كلّما اتباعد وداده زاد
نهار فرقاك يامحبوب=لامن موادع ولا ميعاد


ياليت ياعبيد مامرّيت(رمرامه)=ولا نظرت المنازل عقب أهاليها


* رمرامه : منطقة تقع بين المنطقه الغربيه بودباسة جنوب منطقة النمليه

يسقى يلي جاني (الفنش) عند (انتربوز)= فلا نيب متحسّف ولاني بكرهاني
باسلّم النمره و من شغلها باجوز= و باروح صوب اللي له القلب طرباني
انا حالفٍ ماسج عن بو نهد مركوز=الا كان يسلو من النواطير عمراني


[B(الفنش) : الاقاله

(انتربوز) : اسم الشركه

( النمره ): الرقم

المصدر: ديوان احمد بن علي الكندي

كم بصبر

كم بصبر كم باداري = لاجل خلٍ ما تعرفونه
والهوى يسرى به الساري = من بلي به تسهر عيونه
ما نفع جرح الهوى جاري = والأطبا ما يشوفونه
مستليع وربي الداري = علتى من بية اعيونه
بوخديدٍ كنه اجماري = بنت "م" الخفرات مزيونه
دانةٍ ما سامها شاري = غاليه في البيع مزيونه
لو طلع في زينه ايماري = كان خجل كل مزيونه
حافظ معناه ويداري = ما يحب الناس يشنونه

المقناص

و هي قصيده مهداه الى المغفور له باذن الله الشيخ زايد بن سلطان الله يرحمه و يغفرله

طَرشنا مع الحاكم نهارِ نوى بيشوم = معزّم على المقناص عجلٍ و قصّادي
لطيف المخوّه سبع ظلما خفيف النوم = قوي العزايم مقتدر وين مارادي
شعاهن من (الظفره) تداوس صِبَخ وحزوم = و رمل كما لجبال و سيوح تنقادي
الى (ظفار) و (الجده) و هو حقّهن جيدوم = جداد المواتر لي مشت تقطع العادي
و نقوه حرار الشام مع طيبين قروم = و كل اشقرٍ ممدوح للرّبد صيّادي
و كلٍ مدح طيره و هدّه على زمزوم= نزل مثل برقٍ بين شعفٍ ورعادي
هذا يهدّ و ذاك يبغى الحبارى تقوم= و ذا ينعزل منّه وهذاك قد صادي
هذاك طيره يوم هدّه شهر في الحوم= وقّف بتلواحه على الحزم وينادي
مكثنا بها مدّه قنصنا بها المقسوم = كبار الثنادي و التوافيق م المهادي
و من عقب ذا آمر عليهن عقيد القوم = وخذهن على دار الوهيبه على جادي
يلي حوّلن من سيح طاحن لهن مثموم = ولي طوّفن وادي تعرضّ لهن وادي
وكم هوجعن سوّن بذاري نقاه ارسوم = مقر الجوازي ناحرت فيه لانوادي
و (لمرير) داجن به عليهن تلايا يوم = ومنّه بدى المنكاف و السير متهادي
ومرّن على (وادي العميري) بيوم غيوم = و شقّن مياه السيل و السيل هدّادي
قصدنا بلاد العين يازين ذاك اليوم = مناكيف م المقناص ناصين لبلادي
مع شيخنا زايد ذرانا عساه يدوم = حميد الخصايل حقّنا ذخر و اسنادي


الظفره: منطقه تابعه لبوظبي
ظفار: منطقه تابعه لعمان
الجده: يقصد بها جدة الحراسيس في عمان
لمرير و وادي العميري مناطق تابعه لعمان

المصدر ديوان الشاعر احمد بن علي الكندي



ماضية الليالي

تذكرنى بماضية الليالي=منازل بين هذاك الرمالي
مراسمها بعد الايام عَفْيه=عفت اثارها ريح الشمالى
ألا يا منزل ما بين نزله=رعى الله يوم انا لي فيك غالي
يرحب بي يلي من جيت بيته=ويشرح من ضجيج الهم بالي
وانا لي من يغيت انوي مزاره=نصيته فوق مومية الحبالي
على حمرا مذارعها دقيقه=خفيفه لحم زاغيها الحيالي
يلى حطت مع هجن نجيبه=خذت لاول وخلت كل تالي
وانا اتعبتها فى شف خليّ=لشانه مرخص حالي ومالي
بزينه ماخذ لاول على اوّل=وسبحان الذى خلق الجمالي
كثير الناس ديم يمدحونه=بحسنه والعداله والكمالي
.
.
زورق السعد

حظي تردى ياليت الحظ يتبدل=وابيع حظي لغيري واشتري غيره
مالى بحظ قطعنى من حسين الدل=بقيت بين الرجا والياس والحيره
صابر وبصبر ولوما للقضية حَلْ=الأمر كايد وعند الله تدبيره
إلمن ابيح بسر أمري ومن اسأل=إذا تغير حبيب الروح فى سِيره
يا مالكي فى الهوى مهلك على امْهِل=للوقت دورات والله له مقادير
عندى أمل يوم نتلاقى مثلما لاوّل=فى زورق السعد ما تعلم نواطيره
.
.
اشهد بحبك

يا صاحب الخد النعيم الموّرد=خليت حبك يشتعل فى حشايه
بين العرب بيحت بالحب والسّد=كود ان فيهم من يخفف بلايه
لكن كل واقف لي على حد=عجزت منهم وارتضيت ابشقايه
مسكين من هو فى المحبه منكّد=ما حد ياخذ فى المحبه برايه
اشهد بحبك فى حشى الروح واشهد=حبك سبب مابي وحبك عنايه
يا داعج العينين لا تنوي الصَّد=حيثك دوا جرحي وشوفك شفايه
صواب قلبي بية العين والخد=كل العدل منك وكلك هوايه
..

رجوى

انا اشهد ان المودّه متعبه حالى=ما ريت من هو يساعدني ويهدينى
بينى وبينك قطع ذا الوصل يا غالى=لكن باقي الامل ما بينك وبيني
لا تستمتع ياوليفي قول عذالي=تقال كلمة قفا والناس غافيني
الروح تحيا بروحك وانت عدّالي=ما نستمع م العواذل يا نظر عيني
يا ريح ريحان يا ريحة عرق هالي=تملك حشاية وتقتلنى وتحييني
راجيك وارجوك يا راحة هوى بالي=تكون في قبضتي وانته مصافيني
.
.
الاقدار

مضت لاقدار والاقدار تجري=ومن له فى ردع الاقدار حيله
انا صابر وصبري شق صدري=وخلي قد لقى غيري بديله
ألا يا بدر طالع صبح بدري=بلون يختلف عن كل ليله
فما عذرك وعندك هان قدري=وتلعب فى مودتنا الاصلية
.
.
الجرح الخطير

انا ونيت ونات الكسير=كسير ما تجبر "م" الكسور
من الليعات والهم الكثير=وشي ما تقاويه الصدور
بدعت أمثال من قاصي الضمير=ولب الجوف من حره يفور
مسحت الدمع عن كثر القطير=وزاد الدمع فى كثر العبور
على من حط لى جرح خطير=دريك من صوابه وامخطور
صوابي من هوى طفل صغير=نعيم الطرف مهضوم الخصور
نظرته يوم فى وقت العصير=وهو بيني وما بينه خدور
بدا بوجهٍ كما البدر المنير=يلي من بان وانشا منه نور
ونحرمثلما الطرس النظير=جديد فيه ما خطت سطور
وعين ما يقربها البصير=تجذ القلب لوهو "م" الصخور
نهض من مقعده واقبل يسير=يزاغبه الهوى طرب دجور
بعودٍ لاطويل ولاقصير=على متنه مياديله احدور
وقفت آنا قباله كالأسير=ومما شفت قفت بي الشعور
جمالٍ ما هقيت انه يصير=ولا ظنيت به فى ذا العصور
نوى قتلي وانا منه استجير=وهو قلبه على قتلي جسور
عزيت ولن مالي من يجير=ولا من كان فى حقي يثور
وليفي عال بي وهو خبير=بحقى عال وشهودي حضور
طلبت العفو قال انا بصير=حفظت الحال ما قال معذور
ووسمني على الضلع القصير=وطاوعته على ما راد زور
جزاه الله على فعله بخير=ولو هو ملحق حالي قصور
سلامي له عدد ماناح طير=وعلى عد الليالي والشهور
سلام كان من عبر الاثير=واشواق تحاكيها الزهور
انا مانا على بعده بخير=ولا قلبي على بعده صبور
طلبتك يا سميع ويا بصير=إلهي انت للمذنب غفور
توفق من غدى امره عسير=وشف له حالة منها دبور
.
.
لك الغفران

حمام ناح فى نومي سمعته=يجر الصوت فى عالى المبانى
شغلني خاطري والنوم عفته=سهرت الليل لين الصبح بانى
يخيل القلب محبوب عرفته=زريف الطول ممدوح المعاني
ألا ياليت يا بوسيف شفته=كفى ما تلومني مما بلاني
قهرت القلب فى صبره قهرته=ولكن المطوعه ما عطاني
غلبني كادني وآخر عذرته=بلى الله بالمحبه من بلاني
نزفت الدمع من موقي نزفته=بلا علمي ولا رديت شاني
انا ما كل مافي الوقت خفته=سوى الله العظيم وحب جاني
شربت المر من كاسه شربته=مرير مثل ذوق الحنظلاني
ألا يا من على غيره رفعته=ولو للغير من قدر وشانى
ترى كل الجمال انته جمعته=ولا خليت قسم الحد ثاني
شعاع البدر فى وجهك نظرته=وفارس عينك القاتل غزاني
لك الغفران في حي قتلته=يسامحك الكريم عظيم شاني
.
.
يا طايره

يا طايره طايره فى الجو شليني=مادام مقصدك صوب اهلي وخلاني
انا اترجاك وانتي لا تخليني=أحب داري ولا دار البريطاني
يا ماحلا خاطري يوم توديني=واشوف بيتي وخلاني وبزراني
هم يرتجوني كما رجوى الطراشينى=والطفل لي جيتهم قال اللبو جاني
اصغارهم ترتجينى قبل ذا الحيني=وانا لهم مرتجي والقلب ولهاني
غريب ديرة وسيعة بالبساتيني=حلوة مناظر لها ماني بطرباني
ابغي الصبر لكن الاشواق تشويني=صوب المحبين لا أول ولا ثاني
.
.
يالله ياعالم

يالله يا عالم خفيات لانسان=انت عالم والناس ما يعلموني
منك الفرج يا منجي كل غرقان=وانته مقدر كل شي يكوني
انظر لمن حاله بدا فيه نقصان=عايف منام الناس لي يرقدوني
يرعى نجوم تسري الليل باعيان=ويخفي ونينه لا الملا يسمعوني
والصبح يصبح دون عقل وبرهان=مثل الذى تلعب بعقله جنوني
من حب ناس "م" المخاليق خلان=ما آوو على حالي ولا يرحموني
وش حيلة اللي قضى اليوم غرضان=يالله حقق لي الرجا والظنوني
قضى ديونه " م" العرب كل ديان=مر الزمان ولا تقضت ديوني
حق غدى لي يالاجاويد مابان=عند اعرب وان جيتهم يبعدوني
ان قلت عدوان فلاهم بعدوان=صدقان لي لكنهم ينهبوني
لي من غدى لى عندهم حق ماهان=والافانا كل شي عندى يهوني
جاني على غرة من الود طوفان=خذني ورماني عند من يملكوني
تملكوني واغلقوا كل بيبان=دون المتاب ودون من يعذلوني
واصبحت انا مابين شبك وحيشان=وقيد الهوى بالرجل به قيدوني
مثل الوحش لي صيد من بعد ماكان=يختار فى روس العلا والقروني
.
.
يوم الثريا

يوم الثريا عردت فوق=اختلت صوب الحي براق
أمسيت ما غضا ليه موق=آون والونات بالحاق
ما ينكتم شي على الطوق=لي عاد ما باليوف ينطاق
طلبت ربي يا مر ادفوق=يا مر بغلظ السحب تنساق
تسقي وطن من وثق العوق=فيه ولاتبريه لا علاق
لي خصني من كل مخلوق=واسقانيه كاسات لا محاق
صافي ثمان وحلو منطوق=ريح انسمه مسك إلي فاق
تسقي دياره سحب وبروق="م" العقربي لي ماه هراق
تسمع كنيف الرعد من فوق=مدافع ترمي بالالحاق
ترى الهوى مسنون يا شوق=ماهوب نكره بين الاخلاق
كلن بتبع الحب مسبوق=من غير لي له فى الهوى اعلاق
طلبت وصله كان يافوق=لكن دونه حالت اعلاق
.
.
عيون الناس


انجيهم على عيون الناس=وقلوبنا منهم امصده
من يوم يرمس بك الرماس=يفرقك "م" اللى انته اتوده
غص الصبا طيب الاجناس=اللي شرات القمر خده
بيني وبينه سعوا بلآس=والهجر طالت به المده
لو كنت اضحك مع الجلاس=القلب م الشي لا بده
آسج وافكر وبي وسواس=وادموع لعيون منهده


العصب

يا حي شوف (العصب ) حياه=من عقب سيفٍ موقفه شين
يا زين رزمه يوم ترقاه=واتبين لك كل النياشين
وتوق قلبك فى سنع شاه=وتحري براحة قلبك ابحين
يصفي الكدر يوم الملاقاه=يا جواد واحباب محبين
.
.
يا مها

يا مها وين الذي قلبي يوده=له غلا في القلب يتزايد وداده
سعد ابو من حط راسه والمخده=وخد من وده على خده وساده
صبريه وقف ووصل اليوم حده=ما غفى جفني ولا لذه رقاده
مشكله فى "البدع " لي سيره ورده=ولي تباه ابطيب ما تجي به عناده
من مسك حبل الغرام وزود شده=يصبر ولو مغرمه زاد ابتعاه
بالوفا والخير له مدي ومدّه=يعل يجمعنا الولي باحسن سعاده
طالبينك لي نريده ما ترده=فضلكم يا زين بيّن فى وكاده
ليلةٍ فى العمر لي ودي ووده=التقي وياه وتضفينا السعاده
.
.
لقيت الدار

لقيت الدار من بعد الحبايب=خليه باكيه وبها عجايب
وقفت ابها وانا حيران ساعه=ودمع العين من موقي صبايب
ألا يا دار بالله خبريني=عن المحبوب قولي وين غايب
تقول الدار عقبك غادروني=وخلوني لعيات الهبايب
وسافر من تود وحال دونه=بحر وبرور واخطار ومصايب
رجعت ابحسرتي واهموم صدري=وتقلاني من العبره لهايب
وهانا قد بليت بذي المصيبه=مصيبة حب والدنيا مصايب
وانا من قبل لاجي كان ظني=على هذا وظني كان صايب
الا يا الله لا تقطع رجا اللي=يسألك عن رجوع امحب غايب
عسى المحبوب يرجع بالسلامه=بحفظٍ منك ما تصيبه نوايب
محبٍ مالكٍ عقلي وروحي=وفي حبه رخيص العمر ذايب
يحلي بلولو البحرين صدره=وحنا العين حطه فى الروايب
عسى كل عام يا ديرة حبيبي=عليك ايصب هطال السحايب
لقيت الدار من بعد الحبايب=خليه باكيه وابها عجايب
.
.
يا عبيد

يا عبيد خطفنى عليهم
=باشوفهم يا عبيد لي جيت
لا تلوم قلبٍ يهتويهم
=كنه ربيط ابكسرة البيت
ما نسمع العذّال فيهم
=لي قولهم مابه مثا بيت
الله ينسى من نسيهم
=لي من هواهم ما تناسيت

*عبيد : المقصود به عبيد بن كنيش
.
.
سيد الخود

سيدي يا سيد ساداتي=سيد الخود المزاييني
راعني وارفق بحالاتي=دامني فى حبك ارهيني
انت تفهم كيف عاداتي=وانت جايز فى نظر عيني
وانت مقصودي وراداتي=وين ما تبغى توديني
انت انسي وانت راحاتي=وانت غيرك ما يسليني
لا اتغفل تترك مواساتي=بين ناس ما تواسيني
ما يطفي نار حراتي=غير شوفك يوم بتجيني
واسعد ايامي وساعاتي=يوم فيها تنتظرك عيني
هوب كل الذوق غاياتى=ولا بكل الشرب يرويني
انت ذوقي وانشراحاتي=وانت شربي لي يهنيني
في هواك اتعبت نوقاتي=كم لافن من فراقيني
وكم خبن فى المتاماتي=في العلاوه والملاييني
وانتهيت ابنيل حسراتي=فات شربي في صحن صيني
..

الطيور الطايرة

بِعدكم بِعد الطيور الطايره=والمواقد فى ضميري فايره
ما ذكرتوني على اصروف النوى=يوم انا دارت علي الدايرة
ليت أيامٍ مضت صوبي تعود=كيف ترجع كيف ايام السعود
لا عيون ولا عذول ولا حسود=خاليات امن القلوب الغايره
كم مشينا فى ربوع خاليه=والقلوب امن اللواعج ساليه
كلمةٍ حلوه وروحٍ غاليه=والشعور امن الهبايب طايره
يا ثياب ع الجسم تلمس لبيب=غرت منك غرت من لمس الحبيب
عندما هب النسيم من المغيب=والتفت لفت المهاة الذايره
.
.

شدو العربان

شدوا العربان بالكلي=واتركوا ذا الروح ولهانه
مادروا وش بالحشا حلّي=م الفراق وحرّ نيرانه
مستليع وحالي اعتلي= والحشا شبّت به احزانه
دمع عيني سال وانهلي=يوم قفت عني أظعانه
ويل من هو عقبهم خلي=ضايع عقله وبرهانه
وابعدوا بالغالي الخلي=واجبروه ابهجر خلانه
بوجديل طيبه ايعلي=ينشرى لو غليت أثمانه
يسكرك من ريحة الفلي=لي ما ظهر والكوس طلانه
ما خذٍ م الزين ومخلي=كمّله عن كل نقصانه
أطرب الشوفه ولا املي=وأرخص الغالي على شانه
هو شفاي وشمسي وظلي=راضيٍ فى حكم سلطانه
يعل يرجع لي مودّ لي=ما تخلف الناس ميزانه
وين بلقى عقبك امسلّي=يا شبيه الريم فى اخوانه
احتفظ بالود يا خلّي=لا تهدم رص بنيانه
.
.
ولهان

روحت فى "جيب " امورد=جديد ما بان الغير فيه
روحت ولهانٍ ملدّد=ما حف دمع العين جاريه
على الذي عنّي تبعّد=وانزاح وايدي ما تطاليه
.
.

أهواك بالصدق

حسبي على اللي شقا في الحب شقاني=القلب شقاه ليته ما يشقيني
يا ساكن " السيب "(1) ياللي ساكن اعماني=أهواك بالصدق والله يا نظر عيني
انته محبي وانا لك واسع ابطاني=انا اترجاك وانته لا تخليني



1- السيب : منطقة في دولة عمان

.
.
الدوج


أشهد ان "الدوج" سيره بالتماني=مايكلف راكبه من روف سيره
وارده مافيه من عالي وداني=كون لي ماحط:ليور" عند قيره
ان مشى بالعجل والا بالهواني=يقطع الابعاد لي من شام ديره
يقرب اللي دونهم حايل طماني=والزميم اللي علابيها كبيره
نصّنا ياعبيد مجلي الثماني=لي تراحيبه يلي يجينا كثيره
كل شوف عقب شوفه ماهناني=ياعذاب القلب من فرقى عشيره
لح قلبي لح مشدود الثماني=بين حفّان مراقيها عسيره
وصرم قلبي صرم غرب من سواني=صرم حبله وانثنى في جال بيره
من هوى اللي في معاليقي رماني=رمية صارت على قلبي خطيره
أريش العينين هرجه مطرباني=له نهودٍ ناعمه قدها صغيره
أشهد انه ماوزاه اللي وزاني=مستريح ومادرى عن حال غيره


(1) الدوج : نوع من انواع السيارات
(2) ليور : عصا حديدية تستخدم في المساعدة على فك الاطارات
.
.
الحب الزايد

وايد بحبك وايد=وانته تدري بي وايد
لا تخليني يا روحي=خذني للك شوقي وايد
انا سعدي بوجودك=ان تسعدني من وجودك
احيا من شم اخدودك=ولك مني الحب الزايد
خذني وحياة اعيونك=وقف صبري من دونك
كل الناس ايحبونك=وانته للحب القايد
تلعب بي يا غصن البان=يا ريحة ورد وريحان
انا صياد الغزلان=وانته لي كنت الصايد



لدغني وداده

حبيبي نوى قتلي وانا فى هواه مقتول=متى ايام سعدي فى المحبه توافيني
لدغني وداده فى الحشا مثل لدغ الدول=سرى السم في جسمي وقطع شراييني
حبيب المحبه عن مماتي هو المسؤول=بنظره حبيب الروح يقتلني ويحييني
متى نلتقي قل لي متى يا زريف الطول=يحين اللقا ما بين المحبين لاثنيني
لقانا يشيل الهم والفرح المزعول=وانا ايام سعدي يوم فيها تلاقيني.
.
لعديد

انا يا وجودي وجد من حط فى لعديد=قريب على امسيعيد وادخان بضويه
يقاسي هموم كل ليله عليه اتزيد=دموعه على لوجان تنهل حدريه
على من وطى قلبي ولا راف يا بن اعريد=دعى مهجتي ميدان عسكر نظاميه
يا شوح القلب شوح دوج طلع م السيد=غفل سايقه وتبطل الرود موليه
.
.

أهل البر

يقول اللي سهير ما ينامي=غدى نومي على عيني حرامي
سهير الليل واراعي النجوم=وسرى م الليل زام بعد زامي
يلج اليوف من زود الهموم=كما لجت على اليد الحيامي
هموم اليوف شيئ من جديد=وشيٍّ له مداهيلٍ اقدامي
افكر في الليالي الماضيات=تقضت مثلما طيف الحلامي
اذا راحت ليالي جت ليالي=كذا الأيام تمضي بالهمامي
بها الأفراح تمضي ماتدوم=وبها الأكدار تسقيك الهيامي
سقاك الله يا وقت الخريف=من السحاب هطّال دوامي
يا حيث انّه مضت لي به ليالي=مع الاكرام زوّار حشامي
وقضينا الوقت اللي تفوت=بافراحٍ.. قلوب ابلا ندامي
ويا ماصار في يوم اجتماع=ملاقات الكرام مع الكرامي
ومع الاجواد توجد كل طيّب=وترحيبٍ لقصّاد الخيامي
تطيب العين من شوفٍ عجيب=تخص اهل الملابيس النعامي
وكل عقب ذا بدل مقام=وانا في الحبس طوّلت المقامي
اذا قزّرت به يوم يطوف=حسبت اليوم عن تقزير عامي
ولي هبّت هبوب البر ريف=نسيمٍ راف ماسوى كتامي
ولو هو باردٍ كنّه مليل=على قلبي وجفني ما ينامي
وباقصى اليوف نشحٍ لي شرا=كما تنشح مسامير اللحامي
أنا مشتاق لاهل البر شوق=كما تشتاق للورد الظوامي
وقلبي صوبهم دايم يتوق=كما توقات طيرٍ حر شامي
ألا يا رايحٍ مني قصاد=عجولٍ فوق قطّاع المظامي
يلي من ديس بتروله وساب=كما سهمٍ زرق من قوس حامي
ولي اقفى يسوّي من وراه=غبارٍ مثل قطّاع الرهامي
يلي جيت الحشام اللي اكرام=عليهم رِد مردود السَّلامي
سلامٍ عد ما هبّت رياح=وعدد ماناض برّاق الغمامي
على اللي مشتكي منّه صواب=وذكره دايمٍ عندي دوامي
عليه القلب ولهانٍ عطوف=سباني الود منّه والغرامي
عديم الوصف بوخصرٍ نحيل=ونهدٍ مثلما بيض الحمامي
وميدولٍ يلي هدّه ودنّق=خطيرٍ منه تاطاه الاقدامي
وعينٍ تجعل العاقل هبيل=دعت لي جرح باقصى اليوف دامي
ثقيل العقل لو سنّه صغير =خجولٍ ما يكثّر م الكلامي
ويعطي الهرج منطوقٍ لطيف=كلامٍ به تأدّب واحترامي
كلامٍ يشتفي منه العليل=دوا الممروض للصّاحي اسقامي
انا قلبي تملّى من غلاه=وبقصى اليوف له عندي مقامي
وعلى المختار في ختم النظام=صلاة الله منّي والسلامي
.
.
ياطول صبري

كم لي وكم لي وكم ذكرى اسجّ ابها=لي نامت الناس انا ماغمّضت عيني
يا من سلب مهجتي منّي وشطّ ابها=طال المفارق وخفت انك تجافيني
كلفت نفسي على شانك وبتعبها=ان كان يا نور عيني عاد ترجيني
الروح بيدك وانت اللي معذبها=والحق عندك وما يرضيك يرضيني
يوم الموده رمتني فى مصايبها=ياليت ما كان بين ايديك ترميني
لانته رحومٍ ولا روحي تروف ابها=كل المحبه شقا وانته تشقيني
الروح لوتاصلك نالت مطالبها=واصبحت فى الناس اسعد كل حييني
كم أسأل الريح لي هبت هبايبها=ولا من الريح خبر بايسليني
صبرت قلبي وكبدي زاد لا هبها=تذرف دموعي ونار الشوق تكويني
يا طول صبري على عالي مراقبها=ومجاوب الورق لي غنّى بصوتيني .
.
يا من بلا روحي

الله اكبر يا حبيب نوى اجفاه=يجفي ونحنا ما نوينا الجفا به
نتعب وكل اما تعبنا على ارضاه=وما صابنا كل المصايب أسبابه
كانه يبانا حِن نحبّه ونهواه=بالروح نفدي قربته والقرابه
ابو حجر عينٍ خطيره خفاياه=سيفٍ تسلل من مداخل قرابه
مكتوب فيها سر ما حد يقراه=ومن قرى سرّه تحقق عذابه
يا من بلى روحي عسى الله يبلاه=بالحق والا ما نويت الشقا به
انا بليت بحب منهو حلاياه=مثل القمر لي طالع فى سحابه
لنّه دوا عوقي وقلبي شفاياه= فيها الحليب وسكر القند ذابه
لون البرد بالحق يشبه ثناياه=أوحب رمّان لذيذ الشهى به
يا شِبه ريم خالق الخلق سوّاه=متمتعٍ يا زين عشبٍ رعى به
حذرٍ من اللي يرمي الصيد يرماه=ما هوب كلٍ من تمنى غدا به
هذا كتب يا زين والأمر لله=والكل منا عند ربه حسابه
.
.
عيونك

رمتني من عيونك بندقيّه=ولا اخطى ضربها والضرب فيه
وهانا طايح من بين لابه=وخوفٍ منك ما ثابوا عليه
لأنك فارسٍ فى الناس قاتل=ومن بارزك وافته المنيه
وانا اصبحت فى حبك جريحك=جريح القلب واما الروح حيّه
وعند المقدره فالعفو واجب=تحت أمرك وأنا رافع يديه
وخل الناس من قومك وداري=لأرواحٍ بلا ذنب وخطيه
كذا لقلوب تفزع من عيونك=توارى عن خناجرها الجريه
ورضّف غشوتك واغمد سيوفك=ترى مالك عدوٍ في البريه
وهذا الحسن فتاكٍ سلاحه=ويا ما قد قتل روحٍ بريه
وبحر الحب كمٍّ فيه غارق=به السباح تطويه الطويه
وكم من قبلنا ناس ابتلو به=وفي درب الهوى راحوا ضحيه
..

الكود

عسى الله يسقي "الكود"*=وفيه غض النهد موجود
حبيبي بوعيون سود=وداده باخص حالي
خرز فيه ولا سلم=جرح قلبي وفطر دم
حسين الخد مايرحم=بلحظ العين قتالي
سلام الله على خده=تلالا كنه الورده
كما بيض القطا نهده=يشوف للهوى السالي
حبيب الروح ياروحي=انا في الحب مجروحي
سهرت الليل وانوحي = على فرقاك يا غالي
حبيبي ليش تتدلع=وتحرق قلب لمولع
انا شاكيك ماتسمع=بحبك منشغل بالي


*الكود : اسم مكان يقع في المنطقة الغربيه

.
.

تيلفونك

تليفونك كخيالك=ويش ينفعني الخيال
فيه يوصلني كلامك =بس ما عندى منال
منيتي شوف ابتسامك=في قبالي يا غزال
ان حصل عندي وصالك=حقّقت كل الامال
وآهنا ليل اجتماعك=ما حلا ذاك الوصال.
.
ليش اتغير

ليش إتغير ليش يا مالك الروح=ما بيننا صارت مسافه بعيده
لو قلت لي مسموح باقول مسموح=لو كان قلبي فوق نار وقيده
خل الملاقى بيننا شي مصروح=وياك نرجع في ليالي جديده
إطلب وانا من القلب بهدي لك الروح=ما بيننا خل الليالي سعيده
فراقنا لا لي ولا لك بمربوح=خل القا غالي مثل ما تحيده
لا تستمع يا جامع الروح بالروح=من حاسدٍ هذا الحسد ما يفيده
ان كان ما حبيت باقول لك روح=بصبر وحبك حامياتٍ حديده
يا قلبي اللي "م" المحابيب مجروح=عيا طبيبك "م" الدوا اللي تريده
شرحت له ما قال لي شي مشروح=وش حيلتي ما دام نفسه عنيده
انا كما الغرقان متقبّض ابلوح=اما ظهر والاّ فللقرش صيده
.
.
ونه خفيه

ونيت ونه في ضميري خفيه=ونومي على طول الدجى ما هناني
أسهر الي من ناموا الأدلهّيه=لي ما وزاهم مثل شي وزاني
ابرحت عقب اما عظامي قويّه=رذيل حيل ومشيتي بالتواني
من والي االاقدار جتني رميّه=من حب معسول الشفايا رماني
امريّش العينين صافي الثنيه=امتلف العاشق بسهم العياني
اللي دعا روحي بحبه شقيه=أبكي ودمعي من عيوني غشاني
يا حسرتي واصفق خليه يديه=ويلاه يا قلبٍ هبيل وعصاني
ليت الليالي ما تغثث عليه=بالوصل يسعدني بخلي زماني
نفسي من الهجران صارت غنيه=واستارقت من شوف جالي الثماني
يالله يا عالم بكل الخفيه=يا خالق الارواح يا عز شاني
انك ترد ايامي الاوليّه=ابجاه طه والحرم والقراني
مع صاحبٍ فيه جروحه طريّه=خذ "م" الحشا قلبي وحبه براني
مضت لي الايام عنده هنيّه=عيني تراه وهو بعينه يراني
يغضي بعينه بالتعمّاد ليّه=واختال زوله بين ذيك المباني
كلفتني يابو عيونٍ دعيّه=يا من بودّه باعني واشتراني
سلام من قلبي وروحي سخيّه=اعداد ماذ عذع هبوب اليماني



اهلك المانع

بصيرك فاهم المعناه=ولكن اهلك المانع
ولاجل الكل سويناه=ولا لي فى الهوى شافع
ونهوى كل ما تهواه=وانا في حبّكم طامع
وما تبغي نحن نبغاه=ولكن دربكم شاسع
كفى قلبي بما يكواه=ومن بيكون لي نافع
ودادك في الحشا مرساه=حبيبي لا تكون قاطع.
.

ديرة الخلان

ونّة ٍ ونيتها ليت ماونيتها=ليت ماونيتها يوم ذا فعل الونين
شانت الديرة عليه وانا ملّيها=مثلما ملو من الطفّ* بدو ٍ مينبين
ديرة الخلان ياعبيد مامريتها=في كثر بيّاتنا دايم مستعجلين


*الطف : اسم منطقة تقع بين ابو ظبي ودبي


أنت الحياة

أنت الحياةُ وأنت كُلُّ مودتي=وانت المُحِبُ اذا جَفوني احِبَتي
لولاك ما سهرتْ عُيوني في الدُجى=ولا تصوُّرتُك امام بصيرتي
أحِبُك حُباً شديداً واضحاً=أغلى من الغالي وما في مُهجَتي
يا منية النفسِ الشفُوقِ بحُبها=يا من هو كُلُّ المُراد وغايتي
بادِر بوصلِك يا حبيبي عاجلاً =تشُوفُ ما اقاسي وتنظِرُ حالتي
اذا نَظَرتُكَ طاب قلبي فى الهوى=وانهارت احزاني وطابت عيشَتي
بِكَ تسعَد ايامي وبك كَلَّ المُنى=بك ينجلي همّي وتنمو صحتي
لكن مالي في وِصالِك حيلةٌ=كيِف الوِصالُ وفِيك ضَاعت حِيلَتي
.
.

عسفني ودادك

يقول الحقير مولع حين ينظمو=لي عاد في القلب المولع ملومي
يا قاصدين نحو الاحباب بلغو=مني سلامٍ عد ما خط بقلمي
سلامي عليهم عد ما ذعذع الهواء=واعداد ما طير الفلا قد ترنمي
سلامي عليهم عد مالاض بارقا=اسقى اراضيهم على كل موسمي
سلامي عليهم عد سحبٍ تهرّقت=واعداد من زار الحطيم وزمزمي
حبيبي ترى فرقاك ما هي حلاوةٍ=ذوّقتنى من كاس هجرك علقمي
عسفني ودادك مثل ما عسف حاشيا=لذا عاد فى قبض الحبل لم تعلمي
عليكم فوادي ذاب يا سيدي كما=ذوب الرصاص اللي على النار محتمي
اذكرني وليفي فى الصباعدت جاخل=لا ينقضي وقت الشباب ونندمي
.
.

عندك الروح

آه يا مالكٍ عقلي وروحي=من سببك المحبه عذبتني
منك زادت على العله جروحي=ترقد الليل وهمومي اسهرتني
اطلب العفو يالوجه السموحي=المحبه على دربك رمتني
وقّف الصبر يالظبي الطموحي=والحياه الهنيه فارقتني
عندك الروح وين امّا تروحي=كيف ترجع والاقدار اغدرتني
إلفت النظر يالحلو المزوحي=معك الاقدار صعبه ما اجمعتني
.
.

ديرتي ديره

أمشي وانا اناظر العنقود=يا ما حلى ديرتي زينه
معاك يا بو العيون السود=يا كامل فى تحاسينه
الجود م الخالق الموجود=رحمه ونحنا على دينه
يا ما حلى يا نعيم العود=زينه غدت ديرتي زينه
العشب هذا هو المنشود=من مرّيحيا نظر عينه
سحاب يمطر بدون ارعود=ونبتٍ ظهر من مدافينه
يا حبيبي يا حلى المقصود=حبك بقلبي سكاكينه
خلنا انتمشّى بدار الجود=وانشوف من عشبها زينه.
.
سريه الذيب

لو لا هاك سريت لك سريه الذيب=لي ما يخلي "م" العشا باقياتي
لي من سرى يسري ويدمي المخاليب=رمّ العظام ولا حسب حاسباتي
.

الحبس

انا محبوس عن كل الأهالي=وصدقاني مع اللي كان غالي
ومنهم جيت في منزل قبيح=بسجنٍ منه يكره كل بالي
وان اصبحت فى سجني مقيم=ومن اجواد العرب كلٍ عنالي
وقدني عارفٍ من لي صديق=ومن قلبه عطوفٍ لاجل حالي
عليّه صار ممنوع الخروج=ومن وصل العرب يا عز تالي
على البيبان اقفالٍ حديد=مفاتيحه لها من كان والي
وباب الشّبك تسهر فيه عسكر=بخضرٍ ممهرات لها مزالي
يطلع من اثاميها رصاص=رصاصٍ يقصر أعمارٍ طوالي
وفي أرقابها حطت حراب=سموم الموت فيها والزوالي
كفى الله شرها كل الصديق=ومن سجنٍ له اسقافٍ عوالي
كذلك تايحات الدهرد ترمي=وفي الدنيا تغدر بك الليالي
تراها كالرحى الدنيا تدور=ولا تسعفك في كل الامالي
ولو تسعفك في بعض الشفوف=كما البنت الطموح بلا عيالي
وشي قدّره ربي عليك=يصيبك لو تتّقا في الجبالي
فقل في وقت ما تسطاب : خيره=ولا تكره بما يعطيك والي
فلا انته عالم بما يكون=ولا الأقدار تمنعها بمالي
ولا يقول المرء أنا مطيع=وعند الله دون الناس غالي
فما يكتب على غيره عليه=كتب له ما يشا خلاّق عالي
ورزقه وين ما يرحل وراه=ولو في كف غيره له نيالي
فلا يقطع نصيب العبد حاسد=ولا ينشيه الا ذا الجلالي
وبين الناس سوى الله حظوظ=وفي لحظوظ من داني وعالي
إلي من جاد حظّك بالسعود= سعدت وصرت من ناسٍ عوالي
ولي من بار بك ضاع الدليل=وعنك السعد نوّى برتحالي
ألا يامن على خلقه رقيب=مجيب دعاي يا سامع سوالي
ويا من خالقٍ دنيا ودين=ويا مهدي عبيده "م" الظلالي
فلا تجعل على ظهري ذنوب=فلا ذنوبي وعفوك بالعدالي
ولو عفوك برمل الارض يوزن=فعفوك زاد عن وزن الرمالي
وإجعل منك لي حظٍ سعيد=وفي دنياي لا تكتب شقالي
ويوم البعث ابعثني شهيد=ولا تعطي كتابي فى شمالي
ألا يا رايحٍ منّي جنوب=يجد السير لاوطان الأهالي
على ما كان "م" الطرز الجديد=يقص البعد سيره باعتجالي
الى من طفت من رقعة صليب=تفتّق لك سواريقٍ سهالي
تنابيك الرمال الواقفات=تبين بالعلا من كل عالي
وتدخل بعد ذلك في قرايا=بطرقٍ من صعود الى نزالي
الى من جيت سلّم بالسلام=على أهلي ومن عنّي يسالي
سلام للكبير وللصغير=على النسوان من بعد الرجالي
وإن سألوك عني يا فهيم=فقل لهم ما شكى من عسر حالي
عسى كل خيّرٍ يجزى بخير=ولا يغتث له فى الوقت بالي
فلابد ان كل شيٍّ يهون=نجيهم فوق منقوش الظلالي
جديد الطرز ممتد الجنوب=اديبٍ ما تعلّم بالحبالي
صلاه الله على طه الرسول=عدد ما ذعذعت ريح الشمالي.
.

حادث جرى

ان سلت عن علمي وعن حادث ٍ جرى=باخبرك حتى انك تصير خبير
جينا من الكم(1) الجنوبي من اليوا=في جيب للشركة بوحيب قصير
مرقاع(2) عندي كان في يوم ٍ اقشر=وسياره اخرى معاي تسير
خطفن على رجل ٍ يبا السيف قاصد=وعنده صبي من العيال صغير
قال انقلوني ياهل الجود والكرم=تجزون من رب العباد بخير
نقلناه نبغيها لشانه جميله=وعن كلمة الرديان فينا تصير
ركب عندنا وصرنا بجملة ثلاثة=وولده ركب عنا بموتر غير
عندنا مشينا قدر الله بالقضا=وهو على كل الامور قدير
تعرض لنا في الدرب هيل ٍ من نقا=وخذنا على طرفٍ واحنا نسير
خذتنا ونحن فيها سريع تقلبت=كما قلب صخر ٍ من الجبال كبير
ثم ادفعت عقب العلاه على الوطى=غدى الرمل من فوق الوجوه نثير
ثم قلت انا لربعي عساكم سوالم=ولاحد فيكم قد شكى تعوير
قد قال لي مرقاع انا كنت سالم=وخوينا شكى عظم الفقار كسير
وانا شكيت العوق من الجنب الايسر=لسعني وجع لكن ليس خطير
وخذنا خوينا اللي كسير ٍ معانا=ونقول عسى ان به طبيب بصير
ومن عقب ماوصل "الدخاتر" توفى=قد حط من فوق النعش بيطير
ومن جهة خذني مدير العساكر=وحبست ان حبس بلاتقدير
لاني بمبسوطٍ على كيف غايتي=ولاني بفي شده وقل الخير
الاجواد توصلني على كل ساعه=والله بكل اما يصير خبير
عسى انها تالي الامور هواين=مايعلم الانسان ويش يصير
مادامها عند والي العرش طيبه=تنجا لو تطبع ببح غزير
ولا همّني الا فراق الجماعه=ودار ٍ له دايم معي تذكير
عسى الله يسقيها بحقبٍ شوامخ=تظهر عليها من المغيب غصير
تشاعل بها لبروق من كل جانب=وغدى الليل من لمع البروق منير
تغبّا سماها والشوامخ ترضفت=وسوّى الرعد بين القنوف هدير
ثلاثين ليله يمطر الحسب ما اجتلت=ولا ابعد عن ابواب البيوت غزير
تباشرت به سكنة البدو واصبحت=تروى رواها من كل شطوط غدير
تلقى غديره عن مغانيه زايد=والسيل سوى في الخروم خرير
شتّت به البدوان ترعى اخضاره=ورودها مامزّرت من بير
ولاتشوف فوق العدّ تنحط زانه=ولا تشوف من عدٍ قطين صدير

(1) الكم : مجمع خاص بالشركات
(2) مرقاع : المقصود به خلفان بن راشد الهاملي مرقاع كنيته


يامرحبا

يا مرحبا يا شيخنا حين ماييت=يا قايد العليا بدين السلامي
ألفين مرحب يا ذري الشعب حييت=نهدي لك الاشواق يا ذا الامامي
ومن شد عزمٍ منك للشعب سوّيت=مداينٍ بارضٍ قفارٍ مضامي
ومدارسٍ الطالب العلم بنّيت=ومساجدٍ تجري بخط النظامي
احييت الاثار القديمة وعزيت=قبايل تشبه جراد التهامي
نفرح الي منك على دارك ألفيت=ونوقف في صفك بالشرف واحترامي
تبارك الرحمن في كل ما نشيت=من زود فضلك يا شريف المقامي.
.
الساد

مهداه الي سمو الشيخ شخبوط بن سلطان آل نهيان رحمه الله


شخبوط واخوانه وجمع الولادي=عساه ذخر للوطن والرعيه
هو غيثنا بامر العزيز المهادي=اسقى الوطن وادعى العطاشى رويه
ورّد لهم "م" (الساد) لين البلادي=(بيب ٍ) ولوفه جارياتٍ وحيه
وانتج عيون النفط في كل وادي=وباتت تشاعل في المرابخ ضويه
وادلال رسلان ٍ اتفك النوادي=في مجلس ٍ من كل زل ٍ حليّه

هذه القصيدة لم نعثر إلا على هذه الأبيات منها وقد فقد الكثير من أبياتها
(1) الساد : منطقة تقع بالقرب من مدينة العين
(2) بيب : انبوب

يا شيخ

يا شيخ يا شخبوط افهم مقالي=عمّا جرى لي من تغايير الاحوال
دارت عليّه غادرت الليالي=وامرٍ قضاه الله ما يمنعه حال
يا صاحب العظمه ويا بو العوالي=يا مزبن الخايف وحمال لاثقال
من هيبته تفضح جميع الرجالي=ومسجّد الديره بقوات ورجال
وبعزم أقوى من صخور الجبالي=حامي حدوده من عدوّه الى عال
ينسرّ به قلبٍ من الخوف مالي=وآل بوفلاح الهم تذاكير وافعال
ردّيت شاني فيك واقبل سوالي=لي فيك ما خاب الرجا والتوسّال
من تلحقه شمسٍ ولا له ظلالي=يا والتجى في الشجرة اللي لها ظلال
بالحكم انا راضي على كل حالي=وفي لازمك حاضر ولودوني ارمال
وانا تحت حكمك من أوّل وتالي=إنفع لمضيومٍ عليه الدهر مال
مالي ولد عمٍ قويٍ بمالي=هذا ولا لي ينفع اليوم رجال
ولا انا من اللي الله عطاهم حلالي=ولا انا من التجار لي تملك المال
لي شيبةٍ عمٍ بقى في التوالي=ماله قليل وعنده عيال جهال
وامٍ عجوزٍ مالها اليوم والي=من غيرأنا والله ما عندها اعيال
صلاة ربي عد ريح الشمالي=على نبيٍ خصه الله بالارسال
.
.
ذروة المجد

يا مرحبا يا ذروة المجد سلطان=مليون واكثر من ضميري صراحه
اعداد ماهز الهوى روس عيدان=والماطر اللي تمتلي به بطاحه
في يوم وصله نورت كل الاوطان=واستبشرت بوجود وجه السماحه
طير الفرح غنى على روس الاغصان=مستبشرٍ ليله ومطلع صباحه
مثل القمر لي من بعد غيبته بان=به تنجلي ظلما الكدر في انشراحه
في غيبته شفنا الشهر جملة أزمان=واليوم يمضي عن سنه فى رواحه
الشهم توقاته كما فرخ شيهان=صوب العلا ما ينتكس في المطاحه
والحر لي من شاف ضيم ونقصان=شفته على السحاب فارش جناحه
سلطان بن زايد سلالة نهيان=شبل الأسد ما تنوطا له مساحه
الطيب طبعه والمراجل بعرفان=اتعرفها من هيبته وا نشراحه
الحزم له فى العزم والحق برهان=واللي عزم فى الأمر يظهر نجاحه
مستبشرٍ وجهه بنورٍ ورضوان=فيه الرضا فيه الفرح والنصاحه
سلطان بن زايد على الظلم سلطان=والحق يفرح به ومطلق سراحه.
.
الحمد للمحمود

الحمد للمحمود محصي ترابها=عالم بما فيها وما قد مشابها
ما دابةٍ فيها كفيلٍ برزقها=الله خالقها وحاسب احسابها
الحمد له وانا بخير ومعزّة=خوي شيخٍ رتبة المجد صابها
حمد ابن حمدان رمزالمعالي=شل المعزة والدّنايا رمابها
معروف في الشطّه ومعروف في الرّخا=ذرب الخطا في كل خطوه مشابها
يا رايح مني على متن طاير=يطوي سراب الجو عالي سحابها
يسرى بها فى مغلس اللّيل ظلما=وفي مهبط الطّيار صبحٍ هوابها
بلغ سلامي ديرتي بيت عزي=حكامها عزي وطاهر ترابها
دار المعزه عزها الله بزايد=فعايله عند الملا ينحكي بها
حبي لها حب الرضيع الى امه=يلي داركه مدروك جوع التوى بها
عز الغريب وعز من يلتجي بها=لكن للعدوان ما ينسخابها
هي أمنا عشنا بمطعوم درّها=بغيرها نشري ولا ينشرابها
بارواحهم هلنا حموها غصيبه=بالسيف من دون العدو صك بابها
يقودهم شيخٍ قديمه فعايله=معرُوف زايد بن خليفه علابها
حامي حمى الديره وأمن حدودها=للعدو صارت نار ما ينوطابها
حتى غدت منها الثعابين هاربه=ردت بخسر وسمها في انيابها
والزايد الثاني غدى اليوم سورها=بالله ابن سلطان عزز ترابها
ماتنكر بالحق في كل دوله=هذا وفي التاريخ يشهد كتابها
والختم صلى الله على المصطفى اللي=جاب الرساله والكثير اهتدابها
.
.
بسم الله الواحد

بسم الله الواحد عظيم الشان=رب الخلايق خالق الانسان
هو واسع الرحمه نحمده ونشكره=ونلوذ به في حزة الأمحان
نرجوه في الشطه ونرجوه في الرخا=منه الثواب ومنه الغفران
كذا يقبل التوبه مجيب لدعانا=سبحان ما اعظم قدرته سبحان
كون لنا عصمة شيوخٍ كريمه=الله يخليهم لنا ذخران
قلته وانا اذكر شيخ في ذا القصيده=وهوالشهم حمد ابن حمدان
يراقي إلى العليا ولا جاز دونها=سامي العلا وسلالة انهيان
حرٍ تعلا في معالي هضابها=والحر هذا موكره عرفان
هذا طريق اهله وهو في طريقهم=تاريخهم مذكور في الأزمان
هُم منبع الشيمه صعيبين في اللقا=هم سورنا هم عثرة العدوان
كذا احمد تلقاه ما هوب دونهم=فرخٍ هداده هدة الشيهان
فيه الشجاعه فيه كل المعاني=اللطف والعادات والاحسان
يرفع جنابك لي بليت بهضيمه=لي ساربك وقتك بلا ميزان
يهوى المعالي والمعزه مثلها=يمشي بدرب العز بالبرهان
تفرح بشوفه يوم يوجد وجوده=الخير فيه ورحمة الرحمن
قصّرت في مدحي له المدح وايد=عارف ويسمح لي على القصران
شيخٍ على كل المعاني تشوفه=نادر ولا تنسى بعد الاخوان
هو فيهم الاكبر معانيه فيهم=عيال نقوه كلهم ظفران
عسى فيهم عين الحسود بارده=والله يحفظه حقهم حفظان
ختمتها في مثل مبداي الأول=باسم الله الواحد عظيم الشان


بوظبي دار المعزة

الشاعر عبد الله بن عامر الفلاسي

يانديبي دن لي "موتر شفر"(1)=من حسين الطرز صنعة ماهرين
من على سيته زها زلّه حمر=ل اشتغل بالروف ماتسمع حنين
المكينه توه "ايلها" (2) خضر=و"التواير"(3) من عطبها سالمين
شيك(4) البترول من شيشه قطر=ورح رعاك الله رب العالمين
يامحمد من قطر امش الظهر=والعصر في بلاد ناس ٍ طيبين
بوظبي دار المعزه والنصر=دار شيخان ٍ قروم ٍ عادلين
ود مكتوبي وعلمي والخبر=صوب احمد بن علي ذرب اليمين
وبلغه مني سلام ومن حضر=مجلسه من الجماعه الطيبين
ثم قله ابن عامر في عسر=يشتكي لك من هوى صافي الجبين
ويشتكي لك من هوى صافي النحر=بايت ٍ ليله يطوح بالونين
خلّفه منه محيديب الظهر=شايب ٍ مجرم وقمار ٍ لعين
كنه اموكل على عيون البشر=يعله الحمى وحاله مايزين
حانه المعبود في تالي شهر="موتر" يدعي عظامه كالطحين
قام يرزح من طمان ٍ في وعر=وشمّته ربي جميع الشامتين
لي بغوه يقوم يمشي ماقدر=منكسر عظمه ومهضوم ٍ حزين
جاته البلوى بأمر والي القدر=وشمتت به قدرته ساعه وحين
جاه من سبع السما نجم ٍ حدر=وجعله بالقاع اسفل سافلين
والعقايب صبته صب المطر=داورت به من شمال و من يمين
قاطع ٍ واقطع من سود الجعر=قاطع ٍ والله يحين القاطعين
حاذفينه ساجنينه في حفر=أو على القامات حروة اربعين
وعن عيون الناس في بعض الجزر=حاجزينه لا مثيب ولا معين
وذا جزا اللي في النميمه ماغتر=المنافق كم فرق من اثنين
والختم صلو عدد ودق المطر="ع" نبي الأولين والآخرين

(1) موتر شفر : نوع من انواع السيارات الامريكية
(2) ايلها : الزيت
(3) التواير : الاطارات
(4) شيك : عبأ وامل



قطر ديرة الأشراف / رد أحمد الكندي

مرحبا باللي لفانا من قطر=مرحبا بك يامحمد كل حين
مرحبا بك عد ماهلّ المطر=وعد ماراحو لمكه زايرين
وعد ما هزّ الهوا عود ٍ خضر=وعد ماتجيب الخلوي من الحنين
بالسلام وبالكلام اللي يسر=والنظام اللي كما العقد الثمين
اعتنيته بالمزيد من الفخر=وكل مضمونه عرفته باليقين
هات لي ياعبيد "جمسيك" الحمر=وارد "امريكا" وصنعة شاطرين
مايعلّم الحراره لو دبر=منوه اللي باللزم مستعجلين
فيك جيك ٍ(1) واربعه ضد الحجر=كامل الاوصاف وسبيره (2) اثنين
والدبل(3) والقير(4) صاحي النمر=وان غمزت السلف(5) سواله رطين
نشِّره ياعبيد واغبش من سفر=واتّكل يعل بحرز الحافظين
فوق لي يقطع سهلها والوعر=مرة ينزو ومراتٍ يلين
وبالسلامه في قطر قبل الظهر=ديرة الاشراف عز الملتقين
وبلغ المكتوب لي منه حضر=لابن عامر بين ذيك الحاضرين
وبلغه مني كلام المختصر=واشرح القصه وهو "م" العارفين
وكل مايبغيه مني في الامر=العمر واللي تطاليه اليدين
لو يطرشني بليل بلاقمر=في سنع خل ٍ يوده من سنين
مستعد يلو يعرضني خطر=لو نظرت الموت بالله استعين
لين يرجع صاحبه مالي عذر=ويهتني وياه هذاك الخدين
ولا يلام اللي تولع وانجبر=كم تتحمل قلوب العاشقين
كم مُولع في الموده ماصبر ماصبر=في شبابه راح عن دنيا ودين
والهوى لو قال من مده وطر=كان كل ٍ صار في حبله مكين
ويعل نقال النميمه "م" البشر=ينقطع ذكره ومنّه سالمين
والف صلى لله على خير البشر=النبي الهادي وسيد المرسلين

(1) جيك : هو اداه تستخدم لرفع السيارة
(2) سبيرة : الاطار الاحتياطي
(3) الدبل : الغيار الاضافي يستخدم في الطرق الرمليه
(4) القير : الغيار العادي
(5) السلف : هو مكان وضع مفتاح تشغيل محرك السيارة

.
.


يالله ياني طالبك

يا الله اني طالبك وانت للدّعوه مجيب=ترحم النفس الشروقه بكل احساسها
ما يهنيها طعامٍ ولاحلو الشريب=والعيون الساهره ما يطيب انعاسها
في ديارٍ لا مساجد ولا تسمع خطيب=والكنائس كل يوم ترن اجراسها
والمساجد كل مسجد على سقفه صليب=ما على الكعبه موجّه مسيّس ساسها
ما تصلي الفرض فيها لربك يا غريب=ديننا الاسلام ماهوب دين اجناسها
ما تعرف الشرق فيها ولا جهة المغيب=لا شمال ولا جنوب كفا الله باسها
النهار أطول من الليل له صبحٍ قريب=والمواقيت اطمست ما تعرف اقياسها
ديرةٍ لو هي عشيبه وماطرها صبيب=الغريب يملها ما يطابع ناسها
نحن في خيرٍ ونعمه وصحتنا تطيب=بس شوق الدار لقلوبنا حماسها
أخويا شيخٍ عزيز ومن نسلٍ نجيب=عنده اذياب العسر ما تسن أضراسها
من نسل قومٍ اكرامٍ وسقمٍ للحريب=المعزه والكرامه لهم من ساسها
في محمد بن بطي كل معروف وطيب=يسلك العدله وطرق الخطا ما داسها
راقي العليا ولو كان مرقاها صعيب=هوب كل من رقاها قبض في راسها
يا ديار العز يا لله عسى وصلك قريب=ديرةٍ نحيا بعرقها وطيب أنفاسها
انتهى لعلاج عندك ورخّص يا طبيب=خذ ملفاتك وحافظ على قرطاسها
ألف صلى الله على المصطفى طه الحبيب=عد مانسنس من المطلعي نسناسها

.
.

ردود الرسالة

يالله يا والي على كل والي=يا قاضيٍ حاجات عبدٍ يساله
راجيك يالمعبود تلطف بحالي=وانته عليم الحال واللي جرى له
البارحه يوم الخلايق اذهالي=عيت لذيذ النوم عيني تناله
بت اتوجّد واصفق الكف خالي=والدمع من عيني تزايد هماله
على فريجٍ دونه اللال حالي=من عندهم ما جا ردود الرساله
اشكي لمن دارس فروع المقالي=صوب الذي لي بالمثايل شكا له
عمي الي عدت قروم الرجالي=عمٍّ مربني وانا من عياله
يا عم انا ولدك على كل حالي=ولاني بجاحد ما مضى امن الجماله
وان شفت في ما قد مضى امن الليالي=هذيك يا عمي دروب الجهاله
لو انا انتزحت بعيد عنكم أسالي=اتخبر الطراش عنكم واساله
من دونكم ياما نزى حزم حالي=ودار يضيع بها قليل الدلاله
صلاة ربي عد ما اهمل خيالي=واعداد من هو للمدينه عناله
واعداد ما هبت هبوب الشمالي=على النبي المبعوث جاب الرساله

.
.

طرقت الباب

طرقت ابواب في حاله ضروره=كما العادات عند العارفينا
وكلٍ لي تفشر في كلامه=وقال ابشر ونحنا حاضرينا
وراحت ساعة الأيام تجري=تمر الشهور تتبعها السنينا
وصارت عندي الدنيا زهيده=وضاقت بي وقل ابيه المعينا
الين الله فرجها عليه=كريمٍ عالم السر الدفينا
وعند الله ما تصعب مصيبه=يسهلها يلي صعبت علينا
وجهت عبيد في يومٍ مبارك=عبيد الجابر الممدوح فينا
عريب الجد له خالٍ مجرب=وله علمٍ يسر السامعينا
يراقي قمة العليا بفعله=ويصعدها بعزمٍ ما يلينا
ويتركها الدنايا لمن بغاها=ويوكر موكر الحر الفطينا
يشوم من الدنا ما يعتني به=وكساب العلا في الأوّلينا
وباب الجود عنده ما يصكّه=ونزهٍ عن دروب المغرضينا
نفعني في مهماتٍ كثيره=وانا مالي عليه اسلاف دينا
ولكن عادة الشيمات تظهر=من أهل المرجلة والطيبينا
ترى الشيمات مخلوقة لاهلها=وتأبى تختلط بالعاثرينا
إذا ضاقت عليك كل النواحي=وعجزت بك هزيل من السمينا
فلا تيأس ووجه الله باقي=ولا تنسي القروم الغانمينا
شرات عبيد كساب الجمايل=كفاه الله شر الحاسدينا
عزيز النفس من بيت المعزه=ومن نسل الكرام السابقينا
وصلى الله على الهادي محمد=شفيع الأولين والآخرينا


ولد عامر

هلا يا حي من جا بالسلام=سلام به تحية واحترامي
هلا به عدا ما هاجت وماجت=وعدد ما هل وبل من غمامي
هلا باللي لفانا من بعيد=تهلي به دموعي بانسجامي
قريته وافتهمت اما حواه=وهاض القلب من حسن النظامي
نظامٍ هاضني واهتضت منه=له الترحيب في شوق وغرامي
ألا يا مرحبا به وألف حيه=عدد مابان نور من ظلامي
وعدد من زار مكه والمدينه=وكل اللي وطى بأرض الحرامي
وعدد ماناحت الورقا بصوت=وما حنّت على المهجور ظامي
انا ببدع على هذا النظام=نظامٍ وانتخبته من نظامي
فهيمٍ في حسابه وانتسابه=كما المختار في بزٍ* يسامي
وأنا من بعد ذلك مستعدٍ=لمن هو خصني زِد الانامي
وبادرني بطبيب من موده=نصح لي بالصداقة باحتشامي
أنا آجاري الطيب بطيب=وقليل الطيب يعداه الكلامي
يهل الجود "م" السحب الحشود=ولاجود بسحاب الكتامي
ونعم الرجل عندى ولد عامر=عزيز الجار باسم الجود سامي
شكيت الصد لي يا ولد عامر=وطال إبك الجفى عقب التلامي
فلا شي على سيره يدوم=ولا شي ما تغيره الأيامي
تكدر مشربك واقفى الحبيب=نعيم الطرف وخصوره اهضامي
دعاك ابحر هجرانه غريق=عسى ماجاك يوزابه همامي
ولي منه تعذرك القريب=أنا لك يا عريب الجد حامي
انا بحماك وآلبي نداك=انا لك ملتزم حد التزامي
انا سلة حسام في يمينك=تعدي به عدوك في الولامي
أنا لك يا نظير العين درع=وذخر لك انا يا بن الكرامي
أنا ضد الذي من كان ضدك=انا لك حاضرٍ وابنى عمامي
انقود الصلح ما بينك وبينه=محب ما يهينك ابتلامي
ونرضي كل من عيوا عليه=بشيماتٍ وطلبه من اكرامي
ولا نذخر عن الغالي حلال=ولانرضى بحبل الانصرامي
ولي عيا عدوك ما يلين=بعود الزان أوحد الحسامي
انقود أرواح ما نعطي صلاح=بيومٍ كم دخانه رهامي
سرايا كلها نقوة اقروم=يحبون الملاقي والصدامي
وطير السعد حام على الصديق=وعلى العدوان طير الموت حامي
انضد الضد ونجيب الحبيب=ومنه اتنال غايات المرامي
تولاف الولايف كن ذوقه=كذوق الفطر من عقب الصيامي
وانا عن حالتي يا ولد عامر=دريت ومنها عندك علامي
وما قد صابني شيٍّ صحيح=سباني حب مضفي اللثامي
أهاذيبه على طول الليالي=بحبٍ واشتياقٍ مع هيامي
وذقت امن الهوى كاس المراره=وعاقتني من الممشى عظامي
اقضي اليوم من كثر الهموم=واعانق صبعي الوسطى البهامي
ابات آنوح واشكي من اجروح=وبالونات اسهرت النيامي
وليف فى الهوى خذني ابتل=كما تل الصعب حبل الخطامي
وله يادل يميل على الردوف=الي هده على المضمر وقامي
طروب البال مزاحٍ عجوب=سلب عقلي بهرج وابتسامي
أنا يا كم عينايه تراين=بزوله بين هذيك الخيامي
أنا ما نساه ليله "م" الليال=تلاقينا بطيفٍ م الحلامي
تصافحنا براحات اليدين=تواجهنا وحن عدنا قيامي
وخزينا كما السكرى قعود=ومال ابنا الغرام ابلا مدامي
وطحنا فوق فرشٍ ناعمات=مهفهفةٍ كما ريش النعامي
اضم اجعود واشم الخدود=برضوان منه لابنتقامي
وصدري بين هذيك النهود =ونحر مالعب فيه السهامي
الي من طحت وسد لي يمينه =ولي من قمت أرخى لي اللثامي
وراح امن الدجى وقتٍ طويل=وبان الصبح من عقب الظلامي
وقمت أقول من عقب الذهول=ألا ياليت حلم الليل دامي
الا ياليت ذا علم وكاد=ملاقات الحبيب في المنامي
وهذا ما جرى لي من الحبيب=عسى يا ولد عامر ما تضامي
ومن له في هوى الخفرات راده=صبر في شيل حمل ما يرامي
وقبلي فى الهوي مجنون ليلى=مع الوديان سايح والاكامي
يلي مرن عليه أريام قال=شبه ليلى عليكن يا ريامي
ومحسن فى الهوى خذله زمان=مهيمٍ في لياليه القدامي
وعقبه فى الهوى شاب الخليفي=سقنه البيض كاس من المدامي
وكم من الهوى أمسى صريع=إيونّ وفيه جرح الحب كامي
تعذر لايداويه الطبيب=وجرح الحب ما يكميه كامي

* بز : الشي الغالي الثمين

خفيف الدم

الشاعر عبد الله بن عامر الفلاسي
*للعلم لم يتم العثور على البيت الأول من القصيدة


ولا ينلام من مثلي مولع=سهير في دجى ليله يوني
من اللي مالكٍ عقلي وروحي=حبيبٍ مخلصٍ ما صد عني
حبيبٍ ودني وانا أوده=ووافق بالهوى فنّه وفنّي
وسيع العين يشدي الورد خده=وجادل ياصل الردف التثنّي
ونهدينٍ كم بيض الحمامه=على بيض الترايب فرّعني
لحا الله الحمام اللي شقاني=يهيجني الي غرد مغنّي
يذكرني هوى من لا بعيني=نظيره بالملا إنسٍ وجني
حبيبٍ لو نسيته ما نساني=ولا اسلى سجّته لوسج عني
جرى حبه بجسمي جري دمي=مع أول ماجواذيبه خذني
مسكني بالولع قوّ الولاعه=وشد الشوق مدبول امتثني
وانا والله ما انسى من ثمانه=كما الجواهر لي زهنّي
لهم في عند مّي اشفاه طره=زجي لبروق ليل شعشعنّي
كساه النور جل الله سوى=جميل في تدلاله امعني
ولاعنا ببحر الشوق مثلي=سرايا جيشه الغاشم وطنّي
وذبيت السلاح وجيت طايع=بعد ما خامص المثني فتنّي
أسير عيونه النجل الكحيله=هن اللي في غرامي غرقني
انا يا عوق قلبي يا طبيبه=ولو كنيت حبك ما يكني
ضماي بجور حبك ورد حايم=سواهيج الهوى منك قصنّي
وسبح لك بجسمي كل نابض=وجمعيات الجوارح سبحني
ونادى لك بمعلوقي منادي=وساجعت الحمام وساجعنّي
على ذكراك يا غرة عيوني=عساي بحاجتي منك امتهنّي
على طاريك كم لبّى فوادي=و ((روادت)) الضماير لجلجني
ولي من فارقت عيني جنابك=طريت اللاس وهمومي طرني
وحاربت المنام وعفت زادي=وحلوات المشارب ما هنني
وكنيّت الجوى يا طول صبري=على ليلات وصل فارقني
وانا بانخاك يا مشكاي تفزع=على من بالهوى يا احمد محنّي
خفيف الدم يالكندي عذابي=مواعيده على طول التمني
وشفت الضيم من جور الموده=صواهيج لقلبي مزعني
أسال الله يجمعنا بحاله=سعيده بعد غربالي ودني
وصلى الله ماهلت هميمه=وصلفات الرواعد قعقعني
على من خصه الله بالرساله=وخير الخلق من إنسٍ وجني


تصاريف الموده / رد أحمد بالكندي


هلا بالجيل ساعة ما وصلني=عدد ما غرد الطير المغني
وما هبت هبوب وسال سيلٍ=وما هز الهوا عيدان فني
ارحب به من القلب الودود=وحقه يوجب الترحيب مني
عدد ما كتب فيه من الحروف=وحلوات القوافي شوّقني
من اللي يشتكي طول البعاد=يبات الليل ملهوبٍ يوني
وهذي من تصاريف الموده=تذوقك المراير لو تهني
ولا يلوم المعنا في غرامه=سوى من كان قلبه ما يحني
وما ذاق من الهوى حلوه و مره=ولا انس حر عبراتٍ تكني
ولا شم الجعود الضافيات=ولا ورد العواتق لي يبنّي
ولا مثل الهوى يقصي المولّع=وبحرٍ من غرق به ما يثني
ولا ينسيك مره غير حلوه=اذا سود الليالي ساعفني
وتلتك الموده يالجميل=وتبعدك الموده بالتمني
وتتحمل قلوب العاشقين=بها ما لا تطيق من التعني
سعدنا في الهوى واخر شقينا=رعى الله القلوب اللي شقنّي
يقاتلنا الهوى ابمعجزاته=وفينا كم غارات يثني
فلا منك يمانعه السلام=ولو جنّدت له إنس وجني
سوى الصبر الجميل اذا قدرته=ولا تبدي لحسادك تجني
ولا يشفي جروح الحب طبٍ=سوى بيضٍ رهافٍ ينعشني
فلا لاذا وشم الطيبات=انا وش بالموده مرغبني
وحتى اليوم باقي في ضميري=صوابٍ باخصني موجعني
بلاني بالهوى غرٍّ بلاني=وفي ميدان عشقه جاذبني
وذوقني غرابيل الموده=ولا حقق رجاي وطيب ظني
اذا زاد بعذابي زاد حبه=اوده مخلصٍ ومعذبني
فلا سوى تسليني همومي=ولا وصلٍ يريح القلب مني
وهذا قد جرى يا بومحمد=عسى ليلات وصلك يرجعني
لأن الله له للعبد نظره=وابواب رحمته ما يغلقني
ويبلغ من تأنى ما تمنّى=عسى بعض الليالي يسعدني
وانا يا بومحمد في شفوفك=اترك كل شغل مشغلني
أبيع الروح وارخص كل غالي=ولو كثر المشاكل كلفني
ولو انا غارقٍ في بحر ودي=ألبي عزوتك يا عازيني
ولا أذخر ولو تِلْفَت حياتي=لانك بالجمايل مالكني
ولا ذخر اللزيم إلا اللزيم=اذا صروف الليالي فرقني
اقوم بواجبي وبكل جهدي=لشانك والتزم في كل فني
وصلى الله على خير البرايا=عدد ما غرد الطير المغني

.
.

نهار وصلك

على ما قال الاولي بن ظاهر=هذى عصور ماضيات اقدامي
لا تصحبنّ انسان قبل اتجربه=وتراه اذا كثر الحديث اوهامي
حلفت انا ما نقل لحد ابغاضه=ولا ليت سدي للغشيم غشامي
السد مثل اما تكون الامانه=لي خنتها كتبت عليك آثامي
ولي عاد سدك ما يضمه يوفك=ما يوف غيرك كان له ضمامي
اشكي لمن دارس فروع من الهوى=عارف مواضيع الوداد التّماني
يا ولد عامر اشتكي للك علتي=جرحٍ كتمته في ضميري غتامي
مصيوب من سود العيون ابحربه=بيض المناحر والخدود انعامي
قامن يباهني بحسن ألوانهن=مثل البدور انوارهن اقسامي
تنظر بحالته ولوعٍ اذا نظر=لا بدّ لا يرميه منهن رامي
غرٍ حوى كل الغوى في ماحوى=مادام حقه في السعاده دامي
لو ينتظر فيه المطوع يرتبش=خلا كتابه واستصاب وهامي
نهاره وصله مثلما عيد النحر=لي فيه تفرح جملة الاسلامي
ابدا صوله عن مواصيل غيره=م الناس حتى وصلة الارحامي
يامحلى زمّ الصدور وبعدها=وريحة جعودٍ مثل ريشٍ نعامي
وتعانقن وتوالمن وتمازعن=في ساعة نامت بها النّوامي
توليف حبٍ واجتماع معزه=وعلى الملتقى كل القلوب ضوامي
كني ملكت ارض العراق وماحوى=مسكت وتونس هويا برّ الشامي
لكن ما تقضي المناوي حاجه=الا ان قد اصدقت لا حلامي
سقى الله دياركم من اعمان الى قطر=وقت الصفاري في دروروسامي

كتاب عبدالله

هلا بكتاب عبد الله وحيه=ثلاثين الف وديه فى حسابه
ومن لبي ومن اعماق قلبي=على يا مرحبا يا مرحبا به
تراحيبٍ بها تحيا القلوب=وتشرح صدر من زاد العنابه
كتابه من قريته هاض ما بي=وهاض القلب واظهر صوح ما به
وحطّيته على راسي وعيني=وقبلته تقابيل الهنا به
عرفت الحال واما فيه قال=عرفت الحال واهتميت ما به
صديقٍ خصني زد العباد=من الأبعاد عنّا لي كتابه
صديقٍ ظن فيه ظن خير=وانا حاضر ويبشر ماهقا به
شكى من ظلم هجران الموده=وليفٍ وانكروا وصله احبابه
شكى بالزين من عودٍ حسين=ثليل العين جارحةٍ هدابه
نعيم الطرف مجلي الثنايا=تلاف الروح لحظه من رمابه
وصدرٍ فيه رمانٍ صغار=وعنقه عنق لي رب العدابه
وله وجهٍ يفوق البدر نور=الي منه كشف ضافي حجابه
تزيد العافيه مزة شفاه=دوا الامراض ثغره وان سقى به
ولي شافه تعذب فى هواه=لذيذ النوم عافه ما هتنابه
تجرعك المرار وكي نار=وتنظيمٍ تبعهن في يهابه
صويب البيض يشكي من مريض=وجرحه في الهوى ما ينسطى به
إلى منه سمعت الطير غنى=بأنغامٍ على محلى الغنا به
سطت لي في الحشا نار تلظى=ضجيج اليوف حاميها نظى به
وتلعب بي رياحٍ من غرام=واسباب المحبه والصبابه
كذلك بعد انا حبيت واحد=وداده صاعني واشقيت مابه
وداده في الحشا عاتك وفاتك=وحتى الدم من جسمي جرى به
خشيف الريم لي توه فطيم=الي من بكّر الوسمي رعى به
مضت لي في مهاواته سنين=مطيعٍ طايعٍ في ما هتوى به
اراعي له وداه عن حقاده=على عدله وميله عن عتابه
مضت ايام وده ثم راحت=وراح الوقت واللي قد مضى به
وشيٍّ زلفت به ماضيات=رجوعه يا شفاتي به وما به
ومن يومٍ بيه خان الزمان=وشفت البين وثّق في نابه
كتمت وصرت عن ما بي جحود=عن الحساد وعن لا ينحكى به
انا صابر واصبر وآتصبر=صبور صابر فيما ابتلى به
نجيبكم يا شفاتي من بعيد=على اللي سيرهن كيف وطرابه
يعجبك سيرهن لي من تقافن=سوايه ما تبقيهن رغابه
عليهن من خيار العارفين=وشوابٍ مع شبان لابه
ونمشي صوب من هوله قريب=ونحنا حاضرين ابكل اجابه
ودون الحق فى شفك نعين=ونسعو بالوصل وانفكّ بابه
وناخذ من ملك قلبك هواه=وليفٍ متعبٍ حالك وذابه
ونجمعكم ونصلح كل شان=ونجعلكم بعد هذا انسابه
جزالك الله خير امّا دعيت=عسى دعوتك عند الله مجابه
سقى الله داركم واديار هلنا=بيودٍ هل واجرت به شعابه
ترويه المضامي فى الوسامي=وعم الدار بيود انصبابه
وهذا مالزم واستغفر الله=إذا قولي تباعد عن صوابه
وصلى الله ما حنت ودنت=رعود الصيف فى مدهم حجابه
على خير الملا الهادي محمد=على آله مع كل الصحابه

.
.

مملوك الغرام

لي وليفٍ صاب قلبي واجرحه=بالموده حطم القلب الحطام
صابني وابليت منه وابتليت=بالهوى وابرحت مملوك الغرام
كم سقاني كاس هجره والصدود=واشعل النيران في قلبي دوام
مالقينا للهوى شيٍّ دوى=والمعنا في المحبه ما يلام
رحْ لعبد الله وسلم يا نديب=بلغه مني تقارير الكلام
بومحمد كل ما راده يهون=التزم لاجله بكل امّا يرام
أرخص الغالي لشانه والحياة=والعمر لو طال قافيه العدام
وفي ختام القول من بعده اقول=للنبي ازكى صلاتي والسلام

ماغضت العين

البارحه ماغضت العين بالكرى=والكبد حل ابها الوزى في عمودها
سرى الليل كله والمخاليق نوّمت=وطاب الكرى للي رقد من رقودها
امسيت تلعب بي الهواجيس بالحشا=تلج الحشا لج الظوامي ورودها
يلي فارقتني عبرةٍ جات عبره=سرى بين الاضلاع الحنايا وقودها
كما النار وان شبت على راس ما علا=وزغاها الهوى في عاليٍ من ندودها
أعوي كما سرحان فى قافر الخلا=الي شاف له نشر مكاسيعٍ ذودها
يدور العشا ليلين ما ذاق له عشا=وأحرى ابعشا من نشر بدوٍ يرودها
على وليفٍ تل قلبي من الحشا=تلة جفولٍ تلت اللي يقودها
وحب الحبيب قد قهرني وذلني=كما ذل مسجون بسلاسل قيودها
قم يا نديبي وأرتحل قاسي العضا=جيب من التمرين كمل امعدوها
ما وردوه الا على شف طالب=من المنصع اللي كل آله بزودها
ميكنته لي شغلت كن صوتها=جرادٍ وضع في اللي تشكك برودها
إلي ديس بتروله زرق زرقه الحنش=يهيض غرامك لي تعلا نفوذها
عليه اربعه وسبير من صنع الاطلس=جدادٍ نوى ما رقعوا في جلودها
لي خذت يا مندوب لك كل حاجه=ولا حاجة تطلب الا في وجودها
توصل ديار القرم صالح أبو علي=نسل القروم ومن اكابر اجدودها
عليه سلم لي مع كل من حضر=عنده وخصه بالسلامات زودها
اعداد ما هبت شروق وذعذعت=واعداد ما قد هزت الرياح عودها
واعداد ما هلت قنوف من المطر=واعداد مادن الرعد في ركودها
تعطيه يا مندوب مني رساله=وشكيه الى من للشكايا سنودها
يابوعلي من له لزيمٍ شكى له=وللغير ما يبدي خفايا سدودها
الناس تخفي الحسد وتبين الرضا=ولاتنعرف صدقانها من حسودها
الروح يا صالح على ما انت خابر=رمتها الليالي من مفارق ودودها
اصبحت في ديره وخلي بديره=تشتت ليالي قد عدانا سعودها
وليف وداده غاشي القلب والحشا=ومحبته باتت عليها شهودها
يشهد عليها القلب من حرة الجوى=حتى العروق الناحله من جلودها
وعين الي من عسعس الليل ماغضت=ودموع عينٍ ضايلاتٍ حشودها
يابوعلي عطني كلام يسرني=وهذا وعجّل للشكيه ردودها
هذا وصلى الله على سيد الملا=اعداد ما هبت ذعاذيع نودها

منقول

أخوكم
هيمان يالمحبوب هيمان

 

 

توقيع : هيمان يالمحبوب هيمان



عاشر من تعاشر ,, فلا بد من الفراق
قديم 08-01-25, 01:38 AM   رقم المشاركة : 2
الأمير الصغير
مشرف سابق
 
الصورة الرمزية الأمير الصغير





الأمير الصغير غير متواجد حالياً

الأمير الصغير will become famous soon enoughالأمير الصغير will become famous soon enough


افتراضي رد: الشاعر/ أحمد علي الكندي المرر

اقتباس:
نور القمر

نور القمر يانور = خلك عليه نور
في الليله الظلما = خلّك عليّه نور
لا تبتعد عنّي = لك في الهوا فني
أهواك وأغني = نوّر علّي يا نور
نورك قمر ليلي = بعدك انا ويلي
خرست مناديلي = وانا انتظر يا نور
لك عمري الغالي = وانته شقى حالي
دوم انته في العالي = انزل معي يانور
محتار شا اسوي = من غيرك ايضوّي
القلب متكوّي = وانته بعيد يا نور



الصاحب الغالي

فدينا حبيب الروح والغير ما نفداه = ابيع العمر والروح للصاحب الغالي
لي مالجى في الروح للغير خلّيناه = احب المحب وم الدنّي خاطري سالي
ابو قذلةٍٍٍَِِِِِِِِِ سمرا على الكتف ملواه = يلي من نظرها سالي ما غدا سالي
نقط في حجر عينه صعب ماحدٍٍ يقراه = سوى عارف يعرف وزن خالي ومالي
عزيز بعز أهل المعزة ومن يدراه = ومن يفهم العدله غدا غالي وغالي

اووووبــــس ,,,
صــح لســـااان الشااعر الكندي ...


> اشكـر فنك هيمانوو على القصايد الناايس <
> يعطيــك الــف عــــافيــــــــه <
> مــوفــــــق فــــــي الاختـيــــــااار <
> دمـت لنـا متألق ورائع <
> نتريــا يديدك المميــز والنــايس دومـاً <
> الـــى الامـــــااام دومـــــــــاً <


تحيــــــــاتي لك لك
أمـيروووووه






التوقيع




bb pin : 22073e0f

قديم 08-01-25, 02:34 PM   رقم المشاركة : 3
عـشـوقـه
مشرفه سابقة
 
الصورة الرمزية عـشـوقـه





عـشـوقـه غير متواجد حالياً

عـشـوقـه is on a distinguished road


افتراضي رد: الشاعر/ أحمد علي الكندي المرر

لي عودة ان شاء الله ^_^







التوقيع

|•--{ لســت الأفــضل .. ولــكن لي أســـلوبي }--•|


سأضل دائما .. اتقبل رأي الناقد و الحاسد
فالأول يصحح مساري .. والثاني يزيد من اصراري









إڼ مرت آڷآيآم ۈڷم تـرۈڼي فهـذه مـشآرڪَآتي فـتذڪَرۈڼي
ۈآڼ غبَــــت ۈڷم تــجــدۈڼي آڪَۈڼ ۈقتهآ بَحــــآجــه ڷڷدعآء
|[ فـ آدعۈڷي ]|
قديم 08-01-25, 04:28 PM   رقم المشاركة : 4
المتكشخه
مشرفة سابقة
 
الصورة الرمزية المتكشخه





المتكشخه غير متواجد حالياً

المتكشخه is on a distinguished road


افتراضي رد: الشاعر/ أحمد علي الكندي المرر

بوظبي دار المعزة

الشاعر عبد الله بن عامر الفلاسي

يانديبي دن لي "موتر شفر"(1)=من حسين الطرز صنعة ماهرين
من على سيته زها زلّه حمر=ل اشتغل بالروف ماتسمع حنين
المكينه توه "ايلها" (2) خضر=و"التواير"(3) من عطبها سالمين
شيك(4) البترول من شيشه قطر=ورح رعاك الله رب العالمين
يامحمد من قطر امش الظهر=والعصر في بلاد ناس ٍ طيبين
بوظبي دار المعزه والنصر=دار شيخان ٍ قروم ٍ عادلين
ود مكتوبي وعلمي والخبر=صوب احمد بن علي ذرب اليمين
وبلغه مني سلام ومن حضر=مجلسه من الجماعه الطيبين
ثم قله ابن عامر في عسر=يشتكي لك من هوى صافي الجبين
ويشتكي لك من هوى صافي النحر=بايت ٍ ليله يطوح بالونين
خلّفه منه محيديب الظهر=شايب ٍ مجرم وقمار ٍ لعين
كنه اموكل على عيون البشر=يعله الحمى وحاله مايزين
حانه المعبود في تالي شهر="موتر" يدعي عظامه كالطحين
قام يرزح من طمان ٍ في وعر=وشمّته ربي جميع الشامتين
لي بغوه يقوم يمشي ماقدر=منكسر عظمه ومهضوم ٍ حزين
جاته البلوى بأمر والي القدر=وشمتت به قدرته ساعه وحين
جاه من سبع السما نجم ٍ حدر=وجعله بالقاع اسفل سافلين
والعقايب صبته صب المطر=داورت به من شمال و من يمين
قاطع ٍ واقطع من سود الجعر=قاطع ٍ والله يحين القاطعين
حاذفينه ساجنينه في حفر=أو على القامات حروة اربعين
وعن عيون الناس في بعض الجزر=حاجزينه لا مثيب ولا معين
وذا جزا اللي في النميمه ماغتر=المنافق كم فرق من اثنين
والختم صلو عدد ودق المطر="ع" نبي الأولين والآخرين


عيبتني هالقصيده
ماشاء الله عليه و ع شعره الغاااوي أتمنى له مزيد من التقدم
و مشكووور اخوووووي هيمانوووو ونتريا كل يديدك في المنتدى







التوقيع

قديم 08-01-25, 04:30 PM   رقم المشاركة : 5
تاجر الموت
بحار ملكي
 
الصورة الرمزية تاجر الموت





تاجر الموت غير متواجد حالياً

تاجر الموت is on a distinguished road


افتراضي رد: الشاعر/ أحمد علي الكندي المرر

يسلمو اخوي هيمانو على القصايد الروووعه

والصراحه صح لسان الشاعر

ونترقب يديدك

تقبلي مروووري







التوقيع

قديم 08-01-25, 05:39 PM   رقم المشاركة : 6
عـشـوقـه
مشرفه سابقة
 
الصورة الرمزية عـشـوقـه





عـشـوقـه غير متواجد حالياً

عـشـوقـه is on a distinguished road


افتراضي رد: الشاعر/ أحمد علي الكندي المرر

و جاااان ارجع ^^

قصايد و لا أروع الصراحهــ ..

بس بعض الاشياء ما فهمتها

ابدعت في نقلك اخوي

يعطيك العافيهــ ~







التوقيع

|•--{ لســت الأفــضل .. ولــكن لي أســـلوبي }--•|


سأضل دائما .. اتقبل رأي الناقد و الحاسد
فالأول يصحح مساري .. والثاني يزيد من اصراري









إڼ مرت آڷآيآم ۈڷم تـرۈڼي فهـذه مـشآرڪَآتي فـتذڪَرۈڼي
ۈآڼ غبَــــت ۈڷم تــجــدۈڼي آڪَۈڼ ۈقتهآ بَحــــآجــه ڷڷدعآء
|[ فـ آدعۈڷي ]|
قديم 08-01-25, 08:59 PM   رقم المشاركة : 7
قلب كَنه جمآدي





قلب كَنه جمآدي غير متواجد حالياً

قلب كَنه جمآدي is a jewel in the roughقلب كَنه جمآدي is a jewel in the roughقلب كَنه جمآدي is a jewel in the roughقلب كَنه جمآدي is a jewel in the rough


افتراضي رد: الشاعر/ أحمد علي الكندي المرر

اقتباس:
رمتني من عيونك بندقيّه=ولا اخطى ضربها والضرب فيه
وهانا طايح من بين لابه=وخوفٍ منك ما ثابوا عليه
لأنك فارسٍ فى الناس قاتل=ومن بارزك وافته المنيه
وانا اصبحت فى حبك جريحك=جريح القلب واما الروح حيّه
وعند المقدره فالعفو واجب=تحت أمرك وأنا رافع يديه
وخل الناس من قومك وداري=لأرواحٍ بلا ذنب وخطيه
كذا لقلوب تفزع من عيونك=توارى عن خناجرها الجريه
ورضّف غشوتك واغمد سيوفك=ترى مالك عدوٍ في البريه
وهذا الحسن فتاكٍ سلاحه=ويا ما قد قتل روحٍ بريه
وبحر الحب كمٍّ فيه غارق=به السباح تطويه الطويه
وكم من قبلنا ناس ابتلو به=وفي درب الهوى راحوا ضحيه

..

تعرف توني يايه بسالك ميت ولا لاا الله يرحمه

الله يرحمه كاان شاعر مميز ف شعرة

تسلم ولد الخاله ع النبذه+الشعر الطرر

لاتحرمنا من يديدك المتميز

تقبل مروري المتواضع

اختك

الصغيــ عيناويووه ــرونه






التوقيع
قديم 08-01-25, 09:08 PM   رقم المشاركة : 8
هايم _ هيامي
بحار متقدم
 
الصورة الرمزية هايم _ هيامي




هايم _ هيامي غير متواجد حالياً

هايم _ هيامي is on a distinguished road


افتراضي رد: الشاعر/ أحمد علي الكندي المرر

اول مرا اسمع عن هالشاعر

بس قصايده حلوه وكلماته فيها معاني

سلمت على النقل







التوقيع

 

مواقع النشر


الذين يشاهدون محتوى الموضوع الآن : 1 ( الأعضاء 0 والزوار 1)
 
أدوات الموضوع إبحث في الموضوع
إبحث في الموضوع:

البحـــــث المتقـــــدم
طرق مشاهدة الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة
الانتقال السريع إلى

المواضيع المتشابهه
الموضوع كاتب الموضوع المنتدى مشاركات آخر مشاركة
حمدان بن محمد : نريد المركز الأول دائما lǾnely الأرشيف 2 09-06-10 10:51 PM
الشيخ محمد بن زايد مع شمسه حكم القدر الأرشيف 16 09-05-26 01:12 PM
قصة حقيقيه حدثت في مستشفى راشد؟؟؟ كلي جروح الأرشيف 22 09-05-25 05:28 PM
مائة دعاء لسيدنا محمد صلى الله عليه وسلم ملك الأحزان القسم الاسلامي 3 09-04-25 02:39 PM
عصافير الحب العذاب الأرشيف 1 09-04-22 05:46 PM


الساعة الآن: 09:32 AM

- sitemap -

rss


Powered by vBulletin® Version 3.7.0, Copyright ©2000 - 2014, Tranz By CooLQ8y
 
"لا تتحمّل إدارة منتديات بحار الامارات أيّة مسؤوليّة عن المواد الّتي يتم عرضها و/أو نشرها في منتديات بحار الامارات. ويتحمل الأعضاء بالتالي كامل
المسؤولية عن كتاباتهم وإدرجاتهم التي تخالف القوانين أو تنتهك حقوق الملكيّة أو حقوق الآخرين أو أي طرف آخر. "
جميع الحقوق محفوظة لشبكة ومنتديات بحار الامارات 2006 - 2010©